[A:851]
དུམ་བུ་དགུ་པ། ཀོ་བྲག་པ་དང༌། ནི་གུའི་སྐབས།
ཀོ་བྲག་པ་སློབ་མ་དང་བཅས་པའི་སྐབས།
ཀོ་བྲག་པ་བསོད་ནམས་རྒྱལ་མཚན་ཞེས་ཡོངས་སུ་གྲགས་པ་དེ། ཡུལ་དིང་རི། གདུང་ནི་ལྡོང༌། ཡབ་གཙོ་བོ་རྒྱལ་གཡུང༌། ཡུམ་སྟོད་མོ་རྗེ་མ་གཉིས་ཀྱི་སྲས་སུ་ཆུ་ཕོ་སྟག་གི་ལོ་ལ་སྐུ་བལྟམས། ཆོས་རྗེ་ས་སྐྱ་པཎྜི་ཏ་དང་འཁྲུངས་ལོ་གཅིག བྲིས་ཀློག་རྩོལ་མེད་དུ་མཁྱེན། སེ་མིག་པ་ལ་དགེ་བསྙེན་མཛད། པཎ་ཆེན་ཤཱཀྱ་ཤྲཱི་ལ་བློ་སྦྱོང་སོགས་གསན། གྱམ་དུ་བླ་མ་རྡོ་རྗེ་དཔལ་བ་ལ་རིག་འཛིན་བཅུ། རྫོགས་ཆེན་དམར་ཁྲིད་ལ་སོགས་ཆོས་མང་དུ་གསན། རྒྱ་ཕུག་ཇོ་སྲས་ལའང་རྫོགས་ཆེན་ལ་སོགས་གསན། གྱང་རིམ་དང་ཀོང་མོའི་རི་ལ་མཚམས་མཛད་པས་ཕྱག་རྒྱ་ཆེན་པོས་རྟོགས་པ་འཁྲུངས། པཎ་ཆེན་རཏྣ་རཀྵི་ཏ་ལ་བདེ་མཆོག་གི་དབང་གསན། དེ་ནས་ལ་ཕྱིི་སོགས་སུ་བཞུགས། ཆོས་རྗེ་སྐོས་ལ་མཁན་པོ། ཕྱ་རུ་འདུལ་འཛིན་ལ་སློབ་དཔོན། སློབ་དཔོན་ལོ་ལ་གསང་སྟོན་ཞུས་ནས་དགུང་ལོ་ཉི་ཤུ་རྩ་དགུ་ལ་དགེ་སློང་ཆིག་རྫོགས་མཛད། མཚན་བསོད་ནམས་རྒྱལ་མཚན་དུ་གསོལ། དེ་ནས་ཏི་སེར་བྱོན་ལོ་ལྔ་བཞུགས། ཇི་ལྟ་བ་དང་ཇི་སྙེད་པའི་མངོན་སུམ་གྱི་ཡེ་ཤེས་བརྙེས། ཁྱད་པར་རྡོ་རྗེ་ལུས་ཀྱི་གནས་ལུགས་ཇི་ལྟ་བ་བཞིན་དུ་གཟིགས། མ་ཕམ་གྱི་ཀླུས་ཆུའི་དངོས་གྲུབ་ཕུལ། ཕྱིས་མྱང་སྟོད་ཀོ་བྲག་གི་དགོན་པ་བཏབ་པས་ས་སྐམ་པོ་ལ་ཆུ་མིག་བརྡོལ། ཀོ་