[A:891]པཎྜི་ཏ་སོ་ནས་ཧི་དང༌། ལཀྵྨི་ཀ་ར། དཱ་ན་ཤྲཱི། ཙནྡྲ་རཱ་ཧུ་ལ། སོ་མ་ནཱ་ཐ་ལ་སོགས་པ་ལ་ཆོས་གསུང་ཞིང་བཞུགས་པ་ལ། པཎྜི་ཏ་འདུལ་བ་འབྱུང་གནས་བློ་གྲོས་ཀྱིས་དབང་མདོར་བསྟན་དང་དབང་རབ་བྱེད་ཀྱི་དཔེ་གཉིས་བསྐུར་ནས་གཟིགས་སུ་ཕུལ་བས་ཐམས་ཅད་ངོ་མཚར་སྐྱེས་སོ། ཁྱད་པར་བླ་མ་ཁ་ཆེ་ཟླ་མགོན་ཤིན་ཏུ་དད་པ་སྐྱེས་ནས་དེར་ཆོས་གསན་པ་འཕྲོ་བཅད་དེ། ཆོས་དེ་རྩད་གཅད་དུ་བྱོན་པ་དང༌། ཡུལ་དབུས་སུ་དུས་འཁོར་བ་དང་མཇལ་ནས་དེ་ལ་དུས་ཀྱི་འཁོར་ལོ་ཞུས་པས་གནང་སྟེ། དབང་གདམས་ངག་རྒྱུད་འགྲེལ་པ་ལ་མ་ལུས་པར་རྫོགས་པར་མཛད་དོ། །བླ་མ་འདི་ནི་རིགས་བྲམ་ཟེའི་རིགས་ལ་ལོ་བཅུའི་བར་དུ་ཡབ་ཀྱི་ཆོས་ལུགས་བསླབས་ཏེ། ཚིགས་སུ་བཅད་པ་བཅུ་དྲུག་ལན་རེས་འཛིན་ནུས་པ་ཞིག་བྱུང་ངོ༌། །དེ་ནས་ཡུམ་གྱིས་ནང་པའི་ཆོས་ལ་བཅུག་ནས་ཁ་ཆེ་ཉི་མ་རྒྱལ་མཚན་དང་དུས་ཞབས་ཆུང་བ་གཉིས་ཀྱི་མཁྱེན་པ་ལོན་པར་མཛད་དེ་པཎྜི་ཏར་གྱུར་ཏོ། །བླ་མ་འདིས་བོད་ལ་དུས་ཀྱི་འཁོར་ལོ་སྤེལ་བར་དགོངས་ནས་བོད་དུ་བྱོན་ཏེ། གཉོས་འབྱུང་པོ་ལ་ཆོས་འདི་བསྒྱུར་བར་ནུས་སམ་དྲིས་པས། བདག་གིས་བསྒྱུར་བར་མི་ནུས་ཏེ་ཐབས་ཡོད་ཅེས་ཟེར་ནས་གཡོར་པོའི་བཟང་ཡུལ་གྱི་དགེ་བཤེས་ལྕེ་པའི་སྲས་པོ་འདེགས་པ་ཡོན་བདག་ལ་བཟང་བས་དེར་ཕྲིན་ཅིག་བཏང་ངོ་གསུང་ནས་བང་ཆེན་བཏང་ངོ༌། དེ་ནས་ལྕེ་ཡབ་སྲས་ཀྱིས་སྤྱན་དྲངས་ནས་ཞུས་པས་བསྒྱུར་བ་ཚུལ་བཞིན་དུ་གནང་ངོ༌། །ཡབ་སྲས་འདི་དག་གི་སྐུ་ཆེ་བའི་ཡོན་ཏན་ནི། སྤྱིར་