[A:890]དེའི་དུས་ན་མཐོང་ཚད་ཟིན་པར་འདོད་ཅེས་སྨྲས་ཀྱང་དེ་ལྟར་འབྱུང་བ་ལས། སྔར་གྱི་བློ་རྟུལ་བའི་སྟོབས་ཀྱིས་ཞུ་མ་ནུས། བྲིས་ཀྱིས་ཟིན་པ་ཐམས་ཅད་བློ་ལ་ཟིན་པར་འདོད་དོ་ཞེས་སྨྲས་པས། དེ་ལྟར་བྱུང་ནས་པནྚིཏ་བིནྡོ་ཨཱ་ཙརྻ་ཞེས་བྱ་སྟེ། ཡུལ་དབུས་སུ་ངག་གི་དབང་ཕྱུག་གྲགས་པ་ཞེས་བྱ་བ་པཎ་ཆུང་བཅུ་གཉིས་ཀྱི་བསྐོར་བ་ཞིག་ཏུ་གྱུར་ཏོ། །དེས་སློབ་དཔོན་དུས་ཞབས་པ་ལ་ཆོས་གསན་པས་ཐམས་ཅད་ཀྱང་ལན་རེས་འཛིན་ནུས་པར་གྱུར་ཏེ། དེའི་བརྒྱུད་པ་འཛིན་པ་ནི་དགེ་བསྙེན་བྱང་ཆུབ་ཅེས་བྱ་བ་སྟེ། འདི་ལ་སྲས་པཎྜི་ཏ་ཤིན་ཏུ་ཆེ་བ་ཞིག་ཡོད་པ་ལས། དེས་ནི་ཡབ་ཀྱི་མཆེད་པོ་དགོན་པ་བ་ལ་ཡང་ཞུས་ཤིང༌། ནཱ་རོ་པ་དང་སྟབས་ཤིག་ཏུ་དུས་ཞབས་པ་ཆེན་པོ་ལ་མཉན་པས་དུས་ཞབས་ཆུང་ངུ་ཞེས་ཀྱང་གྲགས་ཏེ། ཡབ་སྲས་གཉིས་ལ་འདོད་པ་མི་མཐུན་པ་ཡང་ཡོད་པར་སྣང་ངོ༌། །དེ་ལྟ་བུའི་ཡབ་སྲས་གཉིས་ཀྱིས་དཔལ་དུས་ཀྱི་འཁོར་ལོ་མི་ཤེས་ན་གསང་སྔགས་མི་ཤེས་སོ་ཞེས་སྨྲ་ཞིང་ཡུལ་དབུས་སུ་བཞུགས་པ་ལས། པཎྜི་ཏ་ཐམས་ཅད་མ་རངས་ནས་ཡུལ་དབུས་སུ་འདུས་ཏེ། བི་ཀྲ་མ་ཤྲཱི་ལར་ཁྲི་བཅས་ནས་རྩོད་པ་བྱས་པས། ཇོ་བོ་ཆེན་པོ་དེ་མ་ཐུབ། ཐམས་ཅད་ཀྱིས་ཁྲི་བོར་ཞིང་ཞབས་སྤྱི་བོར་བླངས་ནས། དཱ་བྱང་ཆུབ་སེམས་དཔའ་མ་གཏོགས་པ་ཐམས་ཅད་ཀྱིས་དུས་ཀྱི་འཁོར་ལོ་མ་ཞུས་པ་མེད་དེ། མཚན་ཡང་དུས་འཁོར་བ་ཞེས་གྲགས་ནས་ཤིན་ཏུ་དར་རྒྱས་སུ་མཛད་དོ། དེའི་ཚེ་ཁ་ཆེའི་ཡུལ་ན་བྲམ་ཟེ་ཞབས་བཟང་པོ་ཞེས་ཀྱང་བྱ། སུརྻ་ཀེ་ཏུ་ཞེས་ཀྱང་བྱ། མཁས་པའི་ཕུལ་དུ་ཕྱིན་པ་དེ་