[A:902]མཁས་པ་དྷརྨི་ཤྭ་ར་ནི། བླ་མ་ཆེན་པོའི་དགུང་ལོ་ལྔ་བཅུ་རྩ་དྲུག་པའི་སྲས་ལོ་བཅུ་གཉིས་ལ་དབང་མདོར་བསྟན་གསུངས་ལོ་བཅུ་དྲུག་པ་ལ་རྒྱུད་འགྲེལ་ཆེན་མོ་བཤད། རྒྱ་གླིང་བ་ལ་སོགས་པའི་མཁས་པ་དག་ཀྱང་རྩོད་པས་ཟིལ་གྱིས་གནོན་པར་ནུས་པ་ཞིག་གོ དེའི་སློབ་མ་ཁང་གསར་བ་ནམ་མཁའ་འོད་ནི། རིགས་ཚོགས་ལ་སོགས་པའི་སྡེ་སྣོད་ལ་ཡང་མཁས། རྒྱུད་འགྲེལ་ཆེན་མོའི་བཤད་པ་བྱེད། ཏིང་ངེ་འཛིན་ཡང་ཕུན་སུམ་ཚོགས་པ་དང་ལྡན་པ་ཞིག་གོ དྷརྨེ་ཤྭ་རའི་སྲས་མོ་ཇོ་འབུམ་ཞེས་པ་གཞོན་ནུའི་དུས་ན་མས་བསྐུལ་ཏེ་མཐུ་བསླབས་ནས་དགྲ་མང་པོ་བརླག་པར་བྱས། དེ་རྟིང་ཡན་ལག་དྲུག་གི་རྣལ་འབྱོར་བསྒོམས་པས། ཚེ་དེ་ཉིད་ལ་རང་བཞིན་གྱིས་གྲུབ་པའི་རྣལ་འབྱོར་མ་རྣམས་དང་སྐལ་བ་མཉམ་པའི་འཕགས་མར་གྱུར་ཏོ། དེའི་མིང་པོ་སེ་མོ་ཆེ་བ་ནམ་མཁའ་རྒྱལ་མཚན་ནི། གཞོན་ནུའི་དུས་ན་རྣ་བ་དང་ལྕེ་ངག་མི་བདེ་བས་རེ་བ་ཆེར་མོད་ཀྱང༌། ཕྱིས་ཁང་གསར་བ་ནམ་མཁའ་འོད་ལ་བརྟེན་ནས་རྒྱུད་འགྲེལ་མཁས་པར་མཁྱེན། ཡན་ལག་དྲུག་དང་ནཱ་རོའི་ཆོས་དྲུག་ཉམས་སུ་བླངས་པས་ཡང་དག་པའིི་ཏིང་ངེ་འཛིན་བརྙེས། སྔོན་གྱི་སྐྱེ་བ་དཔག་ཏུ་མེད་པ་ཡང་དྲན། སེ་མོ་ཆེར་བཞུགས་པས་གྲུབ་ཐོབ་སེ་མོ་ཆེ་བར་གྲགས་སོ། དེའི་སློབ་མ་འཇམ་གསེར་ཤེས་རབ་འོད་ཟེར་ནི། འཁྲུངས་ཡུལ་མྱང་སྟོད་པ། གཉའ་ཞིག་ལ་སོགས་པ་ལ་བརྟེན་ནས་སྡེ་སྣོད་མང་པོ་ལ་མཁས་པའི་ཕུལ་དུ་གྱུར་པ། ལོ་མང་པོར་དཀའ་ཐུབ་ཀྱིས་ལུས་སྦྱངས། ཕྱག་ན་རྡོ་རྗེ་ལ་རིང་དུ་བསྙེན་པས་ལྷ་འདྲེ་