[A:901]ལགས་བྱས་པས། དེ་ལས་ང་ལ་ཡང་མེད། ད་གཞན་ལ་སྟེར་རི་གནའ་སྐྱོལ་གསུང་ནས་མགུལ་ལ་ཕྲེང་བ་བཅུག དེར་བླ་མས་གནང་བ་ནི་མ་ལགས་བྱས་པས། ངན་པ་འདི་གསུང་ནས་དབུ་ལ་བྱེ་མ་པར་བ་གང་རྒྱབ། རེ་ཞིག་ན་ད་འོ་ན་ཁྱོད་ཀྱིས་གཞན་ལ་སྟོན་ལ་མགོ་ལུས་ཚང་བར་བྱིན་ཅིག་ཅེས་རྗེས་སུ་གནང་བའང་འཐོབ། དེ་བཞིན་དུ་ཡུ་མོས་ཀྱང་པཎྜི་ཏ་ལ་ཞུས་པ་ན་ཁྲེས་པོ་བསྟན་ནས་འདི་བལ་ཡུལ་དུ་སྐྱོལ་ཕྱིས་སྟེར་གསུང་བ་ལ། ཡང་གྲོགས་ཀྱིས་གྲོས་བཏབ་སྟེ་སྒྲོ་སྟོན་ལ་ཞུས། སྒྲོ་སྟོན་གྱིས་རྒྱུད་འགྲེལ་མན་ངག་དང་བཅས་པ་དང༌། སྒྲོན་གསལ་མན་ངག་དང་བཅས་པ་གནང༌། དེ་ནས་འུ་ཡུག་ཏུ་བྱོན་ནས་བསྒོམས་པས་གྲུབ་པ་ཡང་བརྙེས། སློབ་མ་ཁྱད་པར་ཅན་ཡང་བྱུང་སྟེ་བརྒྱད་ཅུ་རྩ་གཉིས་ལ་གཤེགས་སོ། དེ་ལ་སློབ་མ་ཝ་བྲག་དཀར་བ་བྱ་བ་དང། གཉལ་པ་གྲོ་བྱ་བ་གཉིས་ཀྱིས་བཀའ་གདམས་ལ་འདག་འབྱར་ཡུན་རིང་དུ་བྱས་ནས། ཕྱིས་བླ་མ་ཆེན་པོའི་དྲུང་དུ་འོངས་ཏེ་གདམས་ངག་བསྒོམས་པའི་ཞག་དང་པོ་ལ་རྟགས་ཐམས་ཅད་རྫོགས་ཏེ། ལམ་གྱི་མཆོག་ཏུ་ངེས་པ་རྙེད། བསྒོམས་པས་མངོན་པར་ཤེས་པ་རྒྱ་ཆེན་པོ་དང་ཡང་ལྡན་ནོ། གཉོས་སྐྱི་ཁུང་བ་བྱ་བས་ནི། ལོ་བདུན་ཅུ་ལོན་ནས་བླ་མ་ཆེན་པོ་ལ་གཏུགས། དེས་ངོར་རྗེ་ལ་གསུངས། དེས་དོལ་བ་འགར་སྟོན་དབང་ཕྱུག་གྲུབ་ལ་གསུངས་སོ། །གྲུབ་ཐོབ་དྷརྨ་བོ་དྷི་ཡང་ཡུ་མོའི་སློབ་མ་ཡིན་ལ། ཏྲེ་བོ་མགོན་པོས་གཞུང་གདམས་ངག་ཐམས་ཅད་མནོས་ནས་རྒྱ་ཆེར་བཤད་ཅིང༌། དེའི་རྒྱུན་ཡང་རིམ་པ་མང་དུ་བྱུང་ངོ༌།