[A:904]བྲག་ཆོས་རྗེ་འཇམ་གསར་དང་མཇལ་བའི་ཚུལ་ནི། གསེར་སྡིངས་པའི་གསུང་གིས་འཇམ་གསར་པ་དང་ལས་འབྲེལ་ཡོད་པས་དེར་སོང་ཅིག་གསུང་བས་བྱོན། གཤིན་རྗེ་གཤེད་ཀྱི་དབང་གསན་པའི་ཚེ་བླ་མ་གཤིན་རྗེ་གཤེད་དུ་གཟིགས། གཞན་ཡང་ལུང་རིགས་མན་ངག་མཐའ་ཡས་པ་གསན། ཁྱད་པར་དུ་དུས་འཁོར་གྱི་དབང་གསན་པའི་ཚེ་བླ་མ་རྡོ་རྗེ་ཤུགས་སུ་གཟིགས་འདི་ལྟར་གདའ་ཞུས་པས། རྡོ་རྗེ་ཤུགས་ཡིན་ནམ་སྙམ་པའི་ང་རྒྱལ་ཡང་ཡོད་པ་ཡིན། འོ་སྐོལ་དཔོན་སློབ་ལ་བགེགས་ཀྱིས་མི་ཚུགས་གསུང༌། དཀྱིལ་འཁོར་དུ་ཞུགས་པའི་ཚེ་ཡེ་ཤེས་ཀྱི་དཀྱིལ་འཁོར་མངོན་སུམ་དུ་གཟིགས། བཞི་པའི་སྐབས་སུ་ང་བཞིན་དུ་ལུས་གནད་ཆོས་ལ་སེམས་མི་རྟོག་པར་ཞོག་གསུངས་པ་ཙམ་གྱིས་འགྱུར་བ་ཕྲ་རགས་ཆད་དེ་བདེ་སྟོང་ཆེན་པོའི་ཏིང་ངེ་འཛིན་དུ་གྱུར། ཕྱིས་སྒོམ་ཁང་དུ་བསྒོམས་པས་ཀྱང་ཉམས་རྟོགས་འུར་ལངས་ཏེ། ཆོས་རྗེའི་གསུང་གིས་གསལ་བ་རབ་ཀྱི་མཐར་ཕྱིན་གདའ་གསུང༌། ཆོས་གྲྭ་དེར་རྣམ་ངེས་ལ་སོགས་པའི་ཆོས་བཤད་མཛད་པས་ཆོས་རྗེས་ཚད་མེད་པའི་བསྔགས་པ་མཛད། སེ་མོ་ཆེ་བ་ལ་ཆོས་འབྲེལ་ཞུར་བྱོན་པས་ཀྱང་ཁྱད་གཉིས་སྐྱེ་བ་བ་མང་པོའི་དཔོན་སློབ་ཡིན་གསུང༌། དུས་ཀྱི་འཁོར་ལོའི་རྒྱུད་འགྲེལ་ཕྲན་དང་བཅས་པ་མ་ལུས་པ་གསན། གཞན་ལ་དབང་རྒྱུད་གདམས་ངག་གིས་ཕན་པ་མང་དུ་མཛད་དོ། དེའི་སློབ་མ་ཀུན་སྤངས་ཐུགས་རྗེ་བརྩོན་འགྲུས་ནི། ལ་སྟོད་བྱང་གི་དབ་ཕྱར་སྤང་སྒང་དུ་འཁྲུངས། དགུང་ལོ་ཆུ་མོ་ཡོས་ཡིན། གཞོན་པའི་དུས་སུ་སྡེ་སྣོད་