[A:905]མང་པོ་ལ་མཁས་པར་སྦྱངས། རྐྱང་འདུར་གྱི་ཆོས་གྲྭར་གྲྭ་པ་ཡང་མང་དུ་བསྐྱངས། རྩོད་པ་ཡང་ཤིན་ཏུ་བཟང་བར་གྲགས། འཆད་ཉན་གྱི་སྐབས་ཤིག་ཏུ་ཀུན་མཁྱེན་ཆོས་སྐུ་འོད་ཟེར་བ་ལ་དུས་འཁོར་གྱི་བཤད་པ་རྫོགས་པར་གསན། མན་ངག་ཞུས་ནས་བསྒོམས་པའི་ཚེ་ཏིང་ངེ་འཛིན་མང་པོའི་སྒོ་བྱེ། སྐབས་ཤིག་ཏུ་སྲོག་གེགས་བྱུང་བ་ཀུན་མཁྱེན་པས་མཁྱེན་ནས་སྤྱན་མ་དྲངས་པ་བྱོན། ཀུན་མཁྱེན་པའི་གསུང་གིས། ད་ལན་གྲོངས་ན་ཁྱེད་རང་སྐུ་བཞི་ལ་འབྱོར་འགྲོ་སྟེ། གདུལ་བྱ་མང་པོའི་དོན་དུ་བཞུགས་དགོས་པས་གསུང་ནས་སྲོག་གེགས་དེ་བསལ། དེ་ནས་འཆད་ཉན་གྱི་སྤྲོས་པ་དོར་ཏེ་གཅིག་ཏུ་བསྒོམ་པ་ལ་གཞོལ་བས་ཀུན་སྤངས་པར་གྲགས། བོད་ན་སྦྱོར་དྲུག་མི་འདྲ་བ་ཡོད་ཟེར་ཚད་ལ་ཡང་གསན་པ་མཛད། བྱང་གི་རི་བརྒྱུད་རྣམས་ལ་འདུག་ས་སྤོ་ཞིང་བསྒོམས་པའི་ཚེ་ཐུགས་དམ་གྱི་སྟོབས་ཀྱིས་མི་མ་ཡིན་མང་པོ་དབང་དུ་འདུས། ཁྱད་པར་ཇོ་མོ་ནགས་རྒྱལ་གྱིས་ཇོ་ནང་དུ་སྤྱན་དྲངས་པས་ལོ་གསུམ་ན་འབྱོན་པར་ཞལ་གྱིས་བཞེས་ཏེ། དུས་ལ་བབ་པ་ན་བྱོན་ནས་དགོན་པ་བཏབ། བཤད་པ་དང་གདམས་པ་གཉིས་ཀའི་སློབ་མ་ཡང་མང་དུ་བསྐྱངས། དེ་དག་གི་ནང་ནས་བྱང་སེམས་རྒྱལ་བ་ཡེ་ཤེས། ལ་སྟོད་པ་དབང་རྒྱལ། མུན་མེ་བྲག་ཁ་བ། སྲོན་བ་ཀུན་རྒྱལ་རྣམས་ལ་ཀུན་སྤངས་པའི་བུ་བཞི་ཞེས་གྲགས། བྱང་སེམས་རྒྱལ་ཡེ་བ་ནི། མེ་མོ་སྦྲུལ་ལ་འཁྲུངས། ཆུང་ངུའི་དུས་སུ་ཀར་མ་པ་ཤིས་ཕ་དེ་མི་འདོད་བཞིན་དུ་བླངས་ནས་ཀར་མ་བའི་ཆོས་རྣམས་དང་ཟང་ཟིང་གིས་ཀྱང་བསྐྱངས།