[A:906]ཕྱིས་ཇོ་མོ་ནང་དུ་བྱོན་ཀུན་སྤངས་པའི་གཞུང་གདམས་ངག་ཐམས་ཅད་གསན་ཞིང་ཉམས་སུ་རྫོགས་པར་བཞེས། ལ་སྟོད་པ་དབང་རྒྱལ་ནི། བསྒོམས་པས་ཕུལ་དུ་བྱུང་བའི་མྱོང་བ་ཐོབ་སྟེ། བར་དུ་དགེ་བ་མན་ཆད་ལ་བླ་མའི་གསུང་ལས་འབྱུང་བའི་ཁྲིད་ཡིག་ཀྱང་མཛད། མང་པོའི་པོའི་བོགས་བཏོན་ཞིང་གེགས་བསལ་ལོ། མུན་མེ་བྲག་ཁ་བ་གྲགས་པ་སེང་གེ་ནི། གཡས་རུ་བྱང་གི་རྒྱལ་ཏེ་ཐང་ཀར་དུ་ཤིང་མོ་ཡོས་ལ་སྐུ་འཁྲུངས། གདུང་རུས་ནི་གླན། གཞོན་ནུ་ལ་ཁྲོ་ཕུ་རིན་པོ་ཆེ་བསོད་ནམས་སེང་གེ་ལས་རབ་ཏུ་བྱུང་ནས། མཚན་གྲགས་པ་སེང་གེར་བཏགས། ཕྱིས་མཁན་པོ་དེ་ཉིད་དང་དབུ་མ་པ་ཤེར་འབུམ་གྱིས་སློབ་དཔོན། བུ་སྟོན་སེང་གེ་འོད་ཀྱིས་གསང་སྟོན་མཛད་དེ་བསྙེན་པར་རྫོགས། ས་སྐྱར་ཕྱ་རུ་བ་སེང་གེ་དཔལ་ལས་རྣམ་འགྲེལ་གསན། བྱམས་ཆོས། རིགས་ཚོགས། རྒྱུད་སྡེ་དང་བཅས་པའི་མཁྱེན་པ་དཔག་ཏུ་མེད་པ་མངའ་ཡང༌། བསྟན་པའི་སྙིང་པོ་སྒྲུབ་པ་ཡིན་པར་དགོངས་ནས། ཇོ་མོ་ནང་དུ་ཀུན་སྤངས་པ་དང་བྱང་སེམས་རྒྱལ་ཡེ་ལ་སྦྱོར་བ་ཡན་ལག་དྲུག་གི་ཁྲིད་ཞུས་ནས་རྒྱུད་གསུང་བར་ཞུས་པས་རོང་དུ་སོང་གསུང་སྟེ། རྒྭ་ལོའི་སྲས་ཆུང་བ་ཨཱ་ཀ་ར་སིདྡྷི་ལ་རྒྱུད་འགྲེལ་ཆ་ལག་དང་བཅས་པ་གསན་ནས། གཡའ་ལུང་གི་རི་ཁྲོད་དུ་སྒྲུབ་པ་གཙོ་བོར་མཛད། ཞར་ལ་རྒྱུད་འགྲེལ་གྱི་བཤད་པ་དང་ཁྲིད་ཀྱིས་སློབ་མ་ཡང་རྗེས་སུ་གཟུང༌། ཕྱིས་རྒྱལ་ཁམས་སུ་ཁ་མོ་ཆེ་བྱུང་བའི་སྟག་གི་ལོ་ལ་ལོ་བེ་བ་ཀུན་བཟང་གིས་སྦྱིན་བདག་བྱས་ནས་བྲག་ཁར་ཕྱགས་ཕབ། དེར་མཚམས་