[A:917]བྱེ་མར་འཁྲུངས་བའི་དགེ་བའི་བཤེས་གཉེན་སྟག་ལུང་རིན་པོ་ཆེ་སངས་རྒྱས་དཔལ་དང༌། དོ་བ་དར་ཤེའི་ཡང་སློབ་མ་ཡིན་པ་ཞིག་གིས། བྱང་ཆུབ་སེམས་དཔའ་རྒྱལ་བ་ཡེ་ཤེས་ལས་ཡན་ལག་དྲུག་གི་གདམས་པ་མནོས་ནས་རི་བོ་རྩེ་ལྔ་ལ་སོགས་པར་ཡང་བྱོན་ཏེ་ཉམས་སུ་བླངས་པས་གྲུབ་པ་ཐོབ་པར་གྲགས་པ་ཞིག་གིས་ཀྱང་བྱང་ཕྱོགས་རྣམས་སུ་ཡན་ལག་དྲུག་གི་བསྟན་པ་རྒྱས་པར་མཛད་ལ། ཡོན་ཏན་རྒྱ་མཚོ་བ་དང་རིན་པོ་ཆེ་ཤེས་རབ་འབུམ་པ་གཉིས་ཀྱི་སློབ་མ་འདམ་དུ་འཁྲུངས་པའི་རཏྣ་ཀུ་མཱ་ར་ཞེས་པ་ཞིག་དང༌། འབབ་རོམ་པའི་གདུང་རྒྱུད་སེང་གེ་དཔལ་ཞེས་པ་གཉིས་ཀྱིས་ཀྱང་བྱང་ཕྱོགས་སུ་ཡན་ལག་དྲུག་གི་བསྟན་པ་རྒྱ་ཆེར་སྤེལ་ལོ། །ཡང་གཉལ་ཞིག་བུ་དགུའི་ཡ་གྱལ་དུ་གྱུར་པ་བོ་དོང་རིན་པོ་ཆེ་རིན་ཆེན་རྩེ་མོས་ཀྱང་བླ་མ་སེ་མོ་ཆེ་བ་ལ་དུས་ཀྱི་འཁོར་ལོའི་བཤད་པ་དང་མན་ངག་ཐམས་ཅད་མནོས་ཏེ། བོ་དོང་རིན་རྩེའི་དུས་འཁོར་ལྷ་མོ་ཆེ་ཞེས་གྲགས་པའི་སྐུ་ཆེན་པོ་ཞིག་ཀྱང་བཞེངས། སྟན་ཐོག་གཅིག་ཏུ་བཟླས་བསྙེན་བྱེ་བ་རྫོགས་པར་མཛད་པས་སྦྱིན་བསྲེག་མཛད་པ་ན་མེ་ལྕེ་དཔལ་བེའུ་དང་གཡུང་དྲུང་འཁྱིལ་བ་ལ་སོགས་པའི་བཀྲ་ཤིས་པའི་མཚན་མ་ཡང་བྱུང༌། དུས་ཀྱི་འཁོར་ལོ་བཤད་པས་སློབ་མ་མང་དུ་བྱུང་བ་ལས། ཁྱད་པར་གདུགས་ཐོགས་བཅོ་བརྒྱད་བྱུང༌། ཁྲིད་བཏབ་པས་སློབ་མ་གྲུབ་པ་ཐོབ་པ་ཡང་བྱུང༌། དགུང་ལོ་ང་གཅིག་ལ་ཤམྦྷ་ལར་གཤེགས་སོ། །བོ་དོང་རིན་པོ་ཆེའི་སློབ་མ་སྟག་སྡེ་བ་སེང་གེ་རྒྱལ་མཚན་ནི། ཕ་རི་ལུང་དུ་ཆུ་ཕོ་སྤྲེའུ་ལ་འཁྲུངས། བོ་དོང་