[A:91]མང་དུ་བཞུགས་པའི་དགེ་འདུན་གྱི་གནས་ཤིག་ཏུ་ཀྭ་འོད་མཆོག་གྲགས་པ་དང་མཇལ་ནས། ཤེས་རབ་ཀྱི་ཕ་རོལ་ཏུ་ཕྱིན་པའི་འབུམ་ཊིག་ལ་སོགས་པ་དང༌། བྱང་ཆུབ་སེམས་དཔའི་ས་ལ་སོགས་པ་མངོན་པའི་ཐེག་པ་ཆེན་པོ་ལོ་བཅུ་གཉིས་སུ་གསན་ནས། མཚན་མོའི་རྨང་ལམ་ན་གླང་པོ་ཆེ་གཅིག་ལ་བཅིབས་ནས་ནོར་བུ་རིན་པོ་ཆེ་ཕྱག་ཏུ་བསྣམས་ནས། ཚོང་འདུས་ཀུན་ཏུ་རྒྱུ་ཞིང་བྱོན་པ་ལ། མི་རྣམས་ཀུན་ན་རེ། བཙུན་པ་ཁྱོད་ཀྱི་ནོར་བུ་བཟང་སྟེ། དེ་ལྟར་རེ་ཞིག་ཉོ་བ་ཡང་མེད། རིན་ཡང་མི་ཐེག་ཟེར་རོ། །དེ་ནས་མནལ་སད་ནས་བསམས་པས། བསྟན་པ་རིན་ཆེན་སྒྲོམ་ཕྱེ་སྟེ། །ཡོན་ཏན་ཆོག་གི་ནོར་བྱིན་ཡང༌། །དམན་རྣམས་དོན་དུ་མི་གཉེར་བས། །རེ་ཞིག་ནགས་སུ་གནས་པར་བྱ། སྙམ་དུ་དགོངས་པའི་སྐབས་སུ། རི་དན་ཏིག་དང་ཉེ་བ་ན་ཐིའུ་རང་སྤུན་དགུ་ཞེས་བྱ་བ་མི་མ་ཡིན་པ་སྟོབས་དང་ལྡན་པ་དེ་རྣམས་བླ་ཆེན་པོ་མཐོང་བ་དང་དད་པ་སྐྱེས་ཏེ། བདག་ཅག་གི་ས་ཕྱོགས་གང་དང་གང་ན་དགོན་པ་ཆེན་པོ་དངོས་གྲུབ་བརྙེས་པ་མང་དུ་བྱུང༌། རྩ་བ་དང་འབྲས་བུ་ལ་སོགས་པ་རྙེད་སླ་བ་དེར་འབྱོན་པ་ཅི་གནང་བདག་ཅག་གིས་ཀྱང་ཁྱེད་ཀྱི་གྲོགས་དང་དགེ་བསྙེན་དུ་ཡང་བགྱིའོ་ཞེས་ཞུས་པས་གནང་ནས་དན་ཏིག་དུ་བྱོན་ནོ། །དེ་ནས་གནས་དེར་དཀོན་མཆོག་ལ་མཆོད་པ་རྒྱ་ཆེན་པོ་དང༌། ཆོས་སྐྱོང་ལ་གཏོར་མ་རྒྱ་ཆེན་པོ་ལ་སོགས་པ་མང་དུ་མཛད་ནས། ཆོས་སྐྱོང་ལ་གསོལ་བ་བཏབ་པ། བསྟན་པ་སྲུང་བ་སྐྱོབ་པའི་སྤྱན་སྔ་རུ། །ཐུགས་དམ་བཞེས་པ་རྒྱལ་སྲས་དཔའ་རྣམས་དང༌། །