[A:92]འཇིག་རྟེན་སྐྱོང་བ་རྫུ་འཕྲུལ་སྟོབས་ལྡན་པ། །སྐྱོབ་ལ་གུས་རྣམས་བདག་ལ་སྟོང་གྲོགས་མཛོད། ཅེས་གསོལ་བ་བཏབ་བོ། །དེ་ནས་བདག་ཉིད་ཆེན་པོ་དེས་ཅིག་ཆར་འཇུག་པའི་རྣལ་འབྱོར་པ་ཞེས་བྱ་བ་དགེ་བའི་ཕྱོགས་ཅི་ཡང་མི་བྱེད་པའི་ལོག་རྟོག་ཅན་མང་བས། དེ་དག་དགག་པའི་ཆེད་དུ་ལྷ་ཁང་དང་མཆོད་རྟེན་དཔག་ཏུ་མེད་པ་བཞེངས། ཚོན་རྩི་ཡང་ཡུལ་དེར་བྱུང༌། བཟོ་ཡང་རང་ཉིད་ཀྱིས་མཛད་ནས་འདུས་བྱས་ཀྱི་དགེ་བའི་རྩ་བ་ལ་བརྩོན་པར་མཛད་དོ། །དེ་ལྟར་དམ་པའི་སྤྱོད་པ་དེ་ལྟ་བུས་དད་པ་སྐྱེས་ནས་སྤ་གོར་ཡེ་ཤེས་གཡུང་དྲུང་ཞེས་བྱ་བ་དེ་འཁོར་མང་པོ་དང་བཅས་དན་ཏིག་ཏུ་བྱོན་པ་དང༌། བླ་ཆེན་པོས་དམ་པའི་ཆོས་འདུལ་བ་ནས་གསུངས་པའི་བསླབ་པའི་གཞི་རྣམས་བརྗོད་པས། རང་ཉིད་ཀྱི་སྤྱོད་ལམ་དེ་ལྟ་བུས་གནོང་ཞིང་འགྱོད་ནས་ཚུལ་བཞིན་དུ་རབ་ཏུ་བྱུང་སྟེ། དེའི་རྗེས་སུ་བར་གནས་བརྟན་གྲགས་པ་ཞེས་བྱ་བ་རབ་ཏུ་བྱུང་སྟེ། སྤ་བར་གཉིས་སོ། །དེ་བཞིན་དུ་ཇ་བ་གྲགས་པ་དང་བཙུན་ཆེན་ཤེས་རབ་འབྱུང་གནས་གཉིས་ཏེ། ཇ་ཅོག་གཉིས་སོ། །དེ་བཞིན་དུ་བཞད་དཔལ་གྱི་རྡོ་རྗེ་ཞེས་བྱ་བ་དང༌། སྲགས་རྒྱ་མཚོ་ཞེས་བྱ་བ་གཉིས་ཏེ། བཞད་སྲགས་གཉིས་སོ། །འལ་པ་རྡོ་རྗེ་དབང་ཕྱུག་དང་བསྣུབས་ལབ་ཤི་དཔལ་གྱི་དབང་ཕྱུག་གཉིས་ཏེ། འལ་བསྣུབས་གཉིས་སོ། །ཟོང་མཆོག་ཆོས་སྐྱོང་དང་འཚུར་ཤེས་རབ་མཆོག་གཉིས་ཏེ། ཟོང་འཚུར་གཉིས་སོ། །འཚུར་གྱི་མཁན་བུ་ཀླུ་མེས་ཤེས་རབ་ཚུལ་ཁྲིམས་ལ་སོགས་པ་དབུས་གཙང་པ་རྣམས་ཡིན་ནོ། །དེ་ལྟར་སྒྲ་མེད་