[A:94]རྒྱལ་ཚབ་བྱམས་མགོན་ལ་འདྲི་དགོས་ཏེ། སློབ་དཔོན་དེ་གཉིས་ཀྱང་ད་ལྟ་དགའ་ལྡན་ན་བཞུགས་ཞེས་གསུང༌། ཡང་འཇིག་རྟེན་གྱི་ཁམས་འདིར་ད་ལྟ་འཕགས་པ་འཇམ་དཔལ་བྱོན་ཡང་བསྐྲད་དེ་གཏོང་བས། ཁོ་བོ་ནི་མགོན་པོ་བྱམས་པ་འཇིག་རྟེན་གྱི་ཁམས་འདིར་མ་བྱོན་བར་དུ་ཛམྦུའི་གླིང་འདི་ཐམས་ཅད་དུ་སྐྱེ་བ་བརྒྱ་ཙམ་དུ་ལེན་དགོས་གསུང་ངོ༌། །བཤད་པ་འདི་རྣམས་དབོན་བི་ཅིས་བྲིས་པ་ལྟར་བཀོད་པ་ཡིན་ཏེ། གཞན་དུ་དབུས་གཙང་གི་མི་དྲུག་གིས་བླ་ཆེན་པོ་ཉིད་ལ་ཐུག་པ་དང༌། གྲུམ་ཡེ་ཤེས་རྒྱལ་མཚན་ལ་བསླབ་བྱ་བླངས་པ་ལ་སོགས་པའི་གཏམ་ཅི་རིགས་སུ་ཡོད་དོ། །གཞན་ཡང་ཆོས་རྒྱལ་སྲོང་བཙན་སྒམ་པོ་ས་མོ་གླང་ལ་འཁྲུངས་ནས་ཡི་གེ་འདི་བགྱིས་པའི་མེ་ཕོ་སྤྲེའུ་ཡན་ཆད་དུ་ལོ་བརྒྱད་བརྒྱ་དང་བཞི་བཅུ་རྩ་བརྒྱད་འདས་སོ། །བསྟན་པ་ཕྱི་དར་གྱི་ལོ་ཚིགས་དང་བླ་ཆེན་པོ་ལ་སོགས་པའི་སྐབས་སོ།། །།
ལོ་ཆེན་གྱི་སྐབས།
སྲོང་བཙན་འཁྲུངས་ནས་ལོ་སུམ་བརྒྱ་དང་ཉི་ཤུ་རྩ་དགུ་འདས་པ་ས་ཕོ་རྟའི་ལོ་ལ་ལོ་ཙཱ་བ་རིན་ཆེན་བཟང་པོ་འཁྲུངས། ཁོང་གིས་བཅུ་གསུམ་བཞེས་པའི་ཚེ་མཁན་པོ་ཡེ་ཤེས་བཟང་པོ་ལ་རབ་ཏུ་བྱུང་ཞེས་བྱ་བ། ཁྲི་ཐང་ཛྙཱ་ནས་བཀོད་པའི་རྣམ་པར་ཐར་པ་ན་འདུག །དེ་ལྟར་ན་ནི་ལོ་ཙཱ་བ་