[A:93]ཞི་བའི་ནགས་ཚལ་དེར། །སྡོམ་བརྩོན་ལྡན་པ་བརྩེ་ལྡན་སློབ་མའི་ཚོགས། །དེ་ལ་འགྲོགས་ན་བདེ་བ་དེ་དག་དང༌། ལྷན་ཅིག་དགེ་བའི་ཕྱོགས་ལ་བརྩོན་པར་གནས། དུས་གཞན་ཞིག་ན་བརྒྱ་བྱིན་ལ་སོགས་པ་འདོད་པ་ཁམས་ཀྱི་ལྷའི་གཙོ་བོ་དང་འཁོར་དུ་མ་བཅས་པ་མང་པོ་མཚན་མོར་ལྷགས་ཏེ། མཆོད་པ་བྱས་ནས་ཆོས་ཉན་པའི་ཕྱིར་འཁོད་པ་དང༌། བླ་ཆེན་པོས་ཀྱང་ཆོས་དང་ལྡན་པའི་གཏམ་གྱིས་དེ་དག་ཡིད་ཚིམ་པར་མཛད་དོ། །ཡང་དེ་དག་ན་རེ། བཙུན་པ་ཁྱོད་ནི་བཟང་ན་མི་མ་ཡིན་པའི་འཁོར་འདི་དག་ནི་ངན་ནོ་ཟེར་ནས་སོང་ངོ༌། །འཁོར་རྣམས་ཀྱིས་ཞུས་པ། མདང་སྣང་བ་འདི་ལྟ་བུ་སྣང་བས། བླ་ཆེན་པོ་དེ་ནི་ངེས་པར་སྤྲུལ་པ་ལགས་སམ་ཞུས་པས་ལན་དུ། །སྤྲུལ་པ་མ་ཡིན་གྱི། བདག་ནི་ཐེག་པ་ཆེན་པོ་ལ་ཞུགས་པའི་སྦྱོར་བའི་ལམ་པ་སྣང་བ་ཐོབ་པ་ལ་ཞུགས་པའི་བན་དེ་དགེ་བ་གསལ་ཡིན་ཞེས་གསུངས། ཡང་སྐབས་གཞན་དུ། དང་པོ་བུད་མེད་སྒོག་འཚོང་མ། །བར་དུ་སྟག་སྣ་ཁྲི་སུམ་རྗེ། །ཐ་མ་མུ་ཟུ་དགེ་བ་གསལ། །ཞེས་ཀྱང་གསུངས་སོ། །དེ་ལྟར་བླ་ཆེན་པོས་ལོ་བཞི་བཅུ་རྩ་དགུ་ལ་དན་ཏིག་ཏུ་བྱོན། ལོ་སུམ་ཅུ་རྩ་ལྔ་དན་ཏིག་ཏུ་བཞུགས། བརྒྱད་ཅུ་རྩ་བཞི་པ་ཤིང་མོ་ཕག་གི་ལོ་ལ་དགའ་ལྡན་དུ་གཤེགས། ཤིང་ཕག་འདི་བསྟན་པ་བསྣུབས་པའི་ལྕགས་བྱ་ནས་བདུན་ཅུ་རྩ་ལྔ་པ་ཡིན། དེ་ལྟར་བླ་ཆེན་པོའི་ཞལ་ནས། འཕགས་པ་ཐོགས་མེད་དང་བཙུན་པ་མཆེ་བའི་སྡེ་གཉིས་ཀྱིས་རྒྱལ་བའི་ཡུམ་གྱི་དགོངས་པ་མི་འདྲ་བ་བཀྲལ་བ་དེ། ཁོ་བོས་