[A:974]རུངས་པ་ལ་ལྷག་པར་བརྩེ་བ་དང༌། རྒྱུ་མེད་པར་གཉེན་གཤིན་པ་དང༌། བྱས་པ་དྲིན་དུ་གཟོ་བ་དང༌། སྐུ་སྲོག་ལ་བསྡོ་བ་ལ་ཡང་ཕན་འདོགས་པར་མཛད་པ་དང༌། ཐོས་པ་མང་བ་ལ་སོགས་པ་དགེ་བའི་བཤེས་གཉེན་གྱི་ཆོས་མ་ཚང་བ་མེད་པ་དང་ལྡན་ཞིང༌། ཐེག་པ་མཆོག་གི་ཐུགས་བསྐྱེད་པས་ལེགས་པར་ཟིན་པའི་ངེས་འབྱུང་གི་སྡོམ་པས་བསྡམས་པ་དང༌། རང་བཞིན་དང་བཅས་པའི་ཁ་ན་མ་ཐོ་བས་མ་གོས་པ་དང༌། དགག་སྒྲུབ་ཀྱི་བསླབ་པ་རིན་པོ་ཆེའི་གནས་ལས་ཅུང་ཟད་ཀྱང་འདའ་བར་མི་སྤྱོད་པས་ཚངས་པར་སྤྱོད་པ་མཆོག་གི་མཐར་སོན་ཏེ་དམ་པའི་ཆོས་འདུལ་བ་ལས་གསུངས་པའི་བསྟེན་པར་འོས་པའི་ཡོན་ཏན་རྫོགས་པར་མངའ་བ་ཉིད་དང༌། རྡོ་རྗེའི་ཐེག་པ་ལ་ལྷག་པར་ཞུགས་པའི་ཐུགས་རྒྱུད་རབ་ཏུ་སྨིན་པ། ཐུན་མོང་དང་ཐུན་མོང་མ་ཡིན་པའི་དམ་ཚིག་ལས་ཅུང་ཟད་ཀྱང་འདའ་བར་མི་སྤྱོད་ཅིང་དབང་གི་དོན་ལྷན་ཅིག་སྐྱེས་པའི་ཡེ་ཤེས་སྐུ་ཉམས་སུ་བསྟར་བ། རྒྱུད་མ་ལུས་པའི་རྡོ་རྗེའི་གནས་དབང་བཞི་པའི་ངེས་པ་ཐུགས་སུ་ཆུད་ནས་སོ་སོ་ཡང་དག་པར་རིག་པ་བཞི་དང་ལྡན་པས་བཀའ་དྲིན་མཛད་པ་ལ་བསྙེངས་པ་དང་བྲལ་བ་སྟེ། དཔལ་ལྡན་བླ་མ་ཞེས་འདོགས་པའི་མཚན་ཉིད་མ་ཚང་བ་མེད་པར་ཡོངས་སུ་རྫོགས་པར་མངའ་བ་ཉིད་ཀྱིས། ལྷ་དང་བཅས་པའི་འཇིག་རྟེན་མཐའ་དག་གི་སྐྱབས་གཅིག་པུ་བར་གྱུར་པ་སྟེ། རྣམ་པར་ཐར་པ་རྒྱ་མཚོ་ཡིད་ལ་བྱ་ཞིང་མཚན་ཁ་ཏོན་དུ་བྱ་བ་དང༌། མི་ཕྱེད་པའི་དད་པ་ཆེ་ཐང་དུ་སྐྱེད་དེ་རྣམ་པ་ཐམས་ཅད་དུ་གུས་པས་ཕྱག་བྱ་བར་རིགས་པ་