[A:974]rungs pa la lhag par brtse ba dang / rgyu med par gnyen gshin pa dang / byas pa drin du gzo ba dang / sku srog la bsdo ba la yang phan 'dogs par mdzad pa dang / thos pa mang ba la sogs pa dge ba'i bshes gnyen gyi chos ma tshang ba med pa dang ldan zhing / theg pa mchog gi thugs bskyed pas legs par zin pa'i nges 'byung gi sdom pas bsdams pa dang / rang bzhin dang bcas pa'i kha na ma tho bas ma gos pa dang / dgag sgrub kyi bslab pa rin po che'i gnas las cung zad kyang 'da' bar mi spyod pas tshangs par spyod pa mchog gi mthar son te dam pa'i chos 'dul ba las gsungs pa'i bsten par 'os pa'i yon tan rdzogs par mnga' ba nyid dang / rdo rje'i theg pa la lhag par zhugs pa'i thugs rgyud rab tu smin pa/ thun mong dang thun mong ma yin pa'i dam tshig las cung zad kyang 'da' bar mi spyod cing dbang gi don lhan cig skyes pa'i ye shes sku nyams su bstar ba/ rgyud ma lus pa'i rdo rje'i gnas dbang bzhi pa'i nges pa thugs su chud nas so so yang dag par rig pa bzhi dang ldan pas bka' drin mdzad pa la bsnyengs pa dang bral ba ste/ dpal ldan bla ma zhes 'dogs pa'i mtshan nyid ma tshang ba med par yongs su rdzogs par mnga' ba nyid kyis/ lha dang bcas pa'i 'jig rten mtha' dag gi skyabs gcig pu bar gyur pa ste/ rnam par thar pa rgya mtsho yid la bya zhing mtshan kha ton du bya ba dang / mi phyed pa'i dad pa che thang du skyed de rnam pa thams cad du gus pas phyag bya bar rigs pa