[A:1125]che zhing byin rlabs kyi mtshan ma mang du byung / 'phral gyi rnam thar mdzad spyod thams cad bla ma gong ma rnams kyi phyag bzhes ji lta ba bzhin du mdzad/ dngos po gang byung rnams kyang bla ma gong ma'i 'das mchod rten bzhengs/ snyoms chung gi rgyags/ mchod khang yar mar gyi mar me rnams la 'phral dag tu gtong / rin po che gtsug rgyan pa gshegs nas lo lnga song ba'i tshe nyid kyi sras bla ma 'od zer ba sogs nyung bsdus shig la lam lnga'i dbang khrid rnams mdzad/ de nas dbyar dgun ma chag par zhi byed brgyud pa snga phyi bar gsum gyi dbang khrid rnams gsungs pas 'gro don 'phel zhing snyan pas kyang sa'i steng kun tu khyab/ dge ba'i bshes gnyen mang pos kyang zhabs la gtugs pa las mchog tu gyur pa ni skyes mchog rin chen bzang po ste/ 'di ni iNdra bhU ti yin par khong rang gis zhal gyis bzhes/ bla ma grags don pa/ gtsang pa blo bzangs pa/ rtogs ldan grags lhun pa la sogs pa mang du byon no/ de nas dgung lo bdun cu bzhes pa sa mo glang gi ston nas sku nyam chung bas sku rim la sogs pa la 'bad pa cher byas/ nyin cig sras rnams la so sor dgon pa 'di gzung dang 'di gyis zhal ta mang du mdzad/ grwa ba'i nang gi dpe 'di rnams khyod shes rab bzang pos nya ra gyis la sman gcig gi sgrub gnas 'di ma stongs tsam dang 'gro don gang byung skyongs shig gsung ba la sogs pa'i zhal ta mang du mdzad de dag pa'i dbyings su gshegs so/ de la sras byang chub bzang po/ dar ma rin