[A:1126]chen/ 'od zer rgyal mtshan/ sgrub pa 'jam dbyangs/ byang chub dpal ldan/ kun dga' bshes gnyen/ chos rje rin po che shes rab bzang po ste bdun las/ /
chos rjes shes rab bzang po me pho stag la 'khrungs/ sku na gzhon pa nas yab kyi drung nyid du gdams pa rnams rdzogs par mdzad/ sgrub pa'i phyag len rnams kyang mnga'/ nyi shu rtsa bzhi nas sgo mo rin po che ye shes dpal ba la sogs pa'i khrid 'phro rnams gnang nas bla mar gyur/ de nas gzung ste lho brag dang gra gnyis kar bar ma chad du gzhan don 'ba' zhig mdzad/ phyag rgya chen po'i rtogs pa dang yang ldan/ dge slong gi khrims rnam par dag pa yang ma yal/ bka' brgyud kyi bdag por gyur pa de la bdag cag rnams kyis zhi byed brgyud pa snga phyi bar gsum zhus pa yin no/ /
rin po che byang bzangs pa'i sras bla ma kun dga' rdo rje ni/ shing pho rta la 'khrungs/ sku gzhon pa'i dus nas yab las sgyu 'phrul zhi khro dang phur pa la sogs pa'i phyag len rnams legs par bslabs shing/ yab dang rin po che shes rab bzang po pa gnyis ka la zhi byed kyi chos skor ma lus pa snga phyir mang du gsan/ da lta yang gdul bya mang po la phan par bzhugs pa 'di'o/ /
smra ba'i seng ge la sras gsum 'khrungs pa'i dang po thams cad mkhyen par grags pa ni/ rgya gar lho phyogs kyi rgyud du lo kya tri nA tha zhes bya ba'i