[A:1127]paNDi ta cig tu gyur/ sngags dang mtshan nyid gnyis ka la mkhas pa'i stobs kyi gzhan gyi rgol ba yang tshar bcad/ slob ma mchog tu gyur pa yang drug tsam byung / de nas sa skya pa chen po kun dga' snying por 'khrungs/ de nas dzA landha rar pradznyA ma ti shrI zhes bya ba'i paNDi ta rdzu 'phrul yang cung zad thob pa cig tu gyur nas/ rdzu 'phrul gyi stobs kyis u rgyan gyi yul du yang bgrod/ der rang byung gi mchod rten dang mjal/ mchod rten de'i phyogs bzhir paNDi ta chen po bzhis bum pa la sogs pa'i dbang rnams rim par bskur/ nam mkha' gang ba'i de bzhin gshegs pas byin gyis rlob pa dang / spyan ma la sogs pa rnams kyi 'khru ba dang / gzugs rdo rje ma la sogs pas mchod pa yang byung / de nas padma brtsegs pa la sogs pa'i dur khrod rnams su spyod pa la phyin pas sgom yun thungs pa'i stobs kyis bar chad du gyur te/ zhe dgu pa la 'das nas/ de nas 'dir 'ongs pa yin zhes bya ba ni khong rang nyid kyi gsung ngo / de yang me pho byi ba'i lo la 'khrungs/ zla ba dgu lon pa'i tshe ri khrod du te ne'i spur sbyangs pa'i sar yum gyis khyer bas spur sbyong gi bkod pa rnams ji lta ba bzhin dran/ lo bdun la klog brda bstan pa tsam gyis shes gnyags ston rnal 'byor 'bum la rig pa klog la sogs pa'i sgra'i bstan bcos rnams kyang bslabs/ yi ge bshar ma zhag bdun gyi 'ablam grongs thub/ phyis ni rgya gar nag u rgyan la sogs pa'i yi ge bris lder la sogs pa'i bzo thams cad shes/