[A:1239]de'i mtha' ni sa mo sbrul yin/ de paN chen gyi nyi shu rtsa gsum pa'o/ zhes bya ba 'di shin tu gsal bas na/ nyi shu rtsa lnga pa lcags mo lug ces bya bar the tshom med do/ 'di la spyi bo lhas pa la sogs pa'i yi ger paN chen bod du rang lo drug cu rtsa lnga pa la phebs so zhes zer ba yang nor ba'o/ bod du phebs pa'i lo ni shing pho byi ba yin par lo tsA bas gsungs pas/ shing pho byi ba ni rang lo bdun cu brgyad pa'o/ de nas chu mo bya'i bar du lo bcu bzhugs nas shing pho khyi la bod nas thegs/ de nas lo skor 'khor ba'i shing mo bya'i lo la lo dgu bcu rtsa dgu lon/ de'i sgrog zla'i tshes lnga gza' spen pa yod pa la yongs su mya ngan las 'das par yang / gcig gis ma tshang lo brgya'i dus/ /bya lo sgrog zla'i dkar phyogs kyi/ /spen pa'i nyi ma'i tshes lnga la/ /'gro ba'i nyi ma nub par bstan/ /zhes 'byung ba'i spen pa'i nyi ma yang paN chen nyid kyis mdzad pa'i lnga bsdus kyi rtsis gzhung gis brtsis na gsal por 'char ro/ don du na paN chen nyid me mo lug la 'khrungs/ sa mo sbrul lo nyi shu rtsa gsum pa la rab tu byung / bdun cu rtsa brgyad pa shing pho byi ba la bod du phebs/ chu mo bya'i bar lo bcu bzhugs/ shing pho khyi la bod nas byon te kha cher gzhan don rgya chen po mdzad nas rang lo dgu cu rtsa dgu pa shing mo bya la zhi bar gshegs so/ zhes bya'o/ bod du ji ltar spyan drangs shing phebs nas 'gro don ji ltar mdzad pa'i rim pa ni/ khro phu lo tsA ba zhes bya ba'i skyes bu dam pa des lo