[A:179]bzhengs pa dang / gso ba dang /gzhan dag bzhengs pa la yo byad gtong ba la sogs pa dpag tu med pa mdzad/ rgya gar nas byon pa'i lo paN mkhas pa rnams kyi zhabs tog mdzad/ bstan pa'i bdag po sngags mtshan nyid kyi sde snod 'dzin pa chen po rnams kyi zhabs nas 'degs/ 'jig rten gyi bya ba spangs nas sgom sgrub mdzad pa dang / sems can dbul zhing phongs pa kun gyi sbyin bdag mdzad/ rgya gar dang rgya nag dang bal po la sogs skad rigs mi gcig pa'i skye bo kun kyang 'dus shing / thams cad kyi dgos 'dod 'byung ba'i gnas su gyur te/ yid bzhin gyi nor bu rin po che dbang gi rgyal po lta bu yin no/ gzhan yang dus gsum gyi bde bar gshegs pa thams cad kyi rdo rje lta bu'i ting nge 'dzin skye ba'i gnas/ me bdun chu gcig la sogs pas kyang gzhig par mi nus pa'i gnas/ byang chub kyi snying po rdo rje'i gdan la mchod pa lan gsum bskyal/ ston pa'i sku tshab lha sa'i jo bo rnam gnyis kyi zhabs tog lan bzhi mdzad/ de la sogs pa'i 'gro ba rnams la dngos dang brgyud pas phan gdags pa'i phrin las dpag tu med pa mdzad de/ byang phyogs kyi rgyud 'dir rtsod med du grags pa yin no/ lha sa'i rdo rags lan bzhi mdzad pa'i phyi ma la gshegs skyems kyi dus su/ 'khor tshos chang 'thab brgyab pas thugs log ste/ khyod tsho ngas sun 'dug ste nga yang khyed tshos sun 'dug cig ngas ga shed cig la khyed tshos mig gis mi mthong rna bas mi thos pa cig bya yis gsung ste/