[A:184]zhal blta zhing rnam gzhag la byon pas/ zhig po bdud rtsi 'ug skad dgon pa na bzhugs pa dang mjal/ zhal mthong ba dang gus pa rang dbang med pa skyes nas/ nang par 'gro tsa na'ang zhabs drung du 'ong / gus par byung bas thugs kyis gzung bar zhu/ zhus pas/ mos par byung ngam gsung / shin tu mos pa byung zhus pas/ 'o na las 'phro yod pa yin pas da lta rang nas sdod/ 'khor ba'i mtshan nyid mi rtag pa yin pas phyis kun ji ltar 'ong cha med gsung / da res sdod rtsis med pas cha rkyen ci yang khyer ma yongs zhus pas/ 'dir 'ong ba la rgyags phye khur nas 'ong ba su yang med/ khyod gcig pu la cha rkyen logs pa ga na dgos gsung de nas de'i tshe rang nas zhabs drung du bzhugs te chos gsan pa las/ de yang rgyud kyi skor la/ kun byed rgyal po ma bu sum bskor/ bshad rgyu mdo bcu/ 'khor ba rtsad gcod kyi rgyud la bshad rgyud sde bzhi/ rtsa ba 'grel pa rgyan chos man ngag dang bcas pa gsan/ rtsa ba bco brgyad kyi bshad srol la zab pa gzhung / gab pa mngon du phyungs te man ngag sgom sdebs su bshad pa/ de'i sgom 'grel snying gi nyi ma drug yang snying rig pa'i nyi ma drug snyan rgyud spro ba nag po'i chos skor dang bcas pa/ sgom yig chen mo/ rig nye/ mig sgron/ gdar sha gzer bu rnams gsan/ gdams pa snyan brgyud kyi skor la/ skor lugs rong lugs khams lugs gsum gyi gdams ngag phyag bzhes khrid dang bcas pa rnams la nan tan cher mdzad/