[A:202]mkha' la/ des sku tshe stod la lho brag gi sna nam nyal yon po la sogs pa bzhi la/ bar du zhu bsod shAka la/ tha ma lha rje 'ug pa lung pa la gsungs so/ yang sna nam tshul khrims byang chub kyis dge bshes mar chung lho brag pa la gsungs/ mar pas lha rje bde gshegs kyi spyan sngar sku drin zhus pas/ lha rje shangs chung pa dang dar ma bsod nams grwa sa rnying par bzhugs pa dang mjal nas/ mar pa sku snyom pa drag po gcig gi zhabs tog lha rje shangs pas mdzad pas dgyes te/ mar pas shangs pa la gnang / lha rje shangs pa bdag gis spyan drangs nas tshul bzhin du zhus pas bdag la gnang ba'o/ zhes gsungs te/ de man chad sgyu 'phrul gyi brgyud pa mthun pa'i sgo nas rje btsun sgrol ma bas mdo dang / de'i 'grel pa sangs rgyas ye shes kyis mdzad pa mun pa'i go cha zhes bya ba'i lung yang bdag la gnang ngo / /mdo'i brgyud lugs kyi skabs so/
rong zom chos kyi bzang po'i lo rgyus kyi skabs/
phul du byung ba'i skyes bu chen po rong pa chos kyi bzang po zhes bya ba'i gtam brjod par bya ste/ de yang rong ba na yon tan rin chen gyi sras rong ban rin chen tshul khrims zhes bya ba zhig byung ste de'i sras yin no/ 'di'i che ba'i yon tan ni/ de nyid kyi slob ma yol dge bsnyen rdo rje dbang