[A:205]kyis bsgyur ba rnams tshe 'di dang phyi ma gnyis ka bde ba la 'god pa'i phyir/ 'byor zhing 'grig pa'i bstan bcos nyid kyi zhal snga nas phyung ste/ de dag la phan 'dogs pa la dus rtag tu skyo ba mi mnga'/ chos kyis blo ma bsgyur ba'i skye bo phal ba la yang ser sna dang gnod sems spangs nas thugs rje'i yul du mdzad de zhi bde la 'god pa/ sdom pa dang thugs dam la nor bu rin po che dang srog gi dbang po ltar gces par mdzad cing / gzhan yang de la 'god pa/ dam pa'i chos rtsom pa na glegs bam bsdus zhing gzigs pa la sogs pa'i rtsol ba ma mdzad kyang / chos phyogs med la thogs rdug med par spro bar nus pa/ des mdzad pa'i chos thams cad kyang lung dang rigs pa dang bla ma'i nye bar bstan pa dang mi 'gal zhing / sgra skyon dang don skyon dang rnam par bral bas gzhan mkhas par grags pa gang gis kyang rtsod mi nus par grags pa'o/ de nyid ni thog ma nyid nas ha cang ma 'bad par saM skr-i ta'i skad la sogs pa rgya gar gyi sgra'i bye brag mang po dang / sgra'i bstan bcos kyi don la ma rmongs par grags/ sku byis chung gi dus su a tsa ra 'dug tshad la dgyes shing de dag gi skad la dgyes/ de nas bi brta'i pu ti la brtags pas mkhyen pa la tshegs ma byung / tha na dud 'gro'i brda dang skad kyang mkhyen par grags/ de'i phyir des mdzad pa'i gsar sngags kyi yi ge rnams la slob pa'i brgyud du byung ba'i gang zag rnams kyi/ lung ma thob par yi ge las byung ba bzhin du sbyar ba las byin rlabs ma byung ga med ces