[A:218]mgon po zhes bya ba lo brgyad bcu rtsa lnga lon pa zhig la gnang ste/ rgas ches te lus kyis zungs ma thub pas sgom rten dang bcas te lus gnad 'char bcug gdams pa yid la zin pa'i phyir tshul shing gtad/ sngar gzhon pa'i dus chos ma grub cing / rgas te 'khor dang gnyen 'dun yang sdang bar gyur pa zhig la/ slob dpon gyi gsung bzhin nyams su blangs pas skye ba med pa'i don rtogs/ dga' ches te slob dpon gyi mgul nas 'khyud nas zhag gcig gi bar du ma btang / nyams su blangs pas lo yang brgya lhag pa thub zer/
de'i slob ma ngan lam byang chub rgyal mtshan yin/ yul dbu ru ngan lam ral gsum pa yin/ dge slong lo drug cu rtsa bdun lon pa zhig gis/ rgyal mo stag rtse mkhar du byon nas spangs mi pham mgon po la gdams pa zhus/ spangs kyi zhal nas yul du ma 'gro bar wa seng ge brag la song la sgoms gsungs nas/ der byon no/ /de'i slob ma za ngam rin chen dbyig ces pa mdo khams stod pa zhig gis ngan lam la gdams pa zhus/ wa seng ge brag tu bla ma'i rtsa nyid du bzhugs so/ /de'i slob ma yar klungs 'chos kyi khu 'gyur gsal ba'i mchog yin te/ dge slong lo lnga bcu rtsa bdun lon pa zhig gis za ngam la gdams pa rnams zhus nas/ wa seng ge brag tu bzhugs nas yar ma byon no/ /ngan lam byang chub rgyal mtshan brgya dang bdun cu rtsa gnyis lon nas lhag med du gshegs/ za ngam rin chen dbyig brgya bzhi bcu zhe bzhi lon nas lhag med du gshegs/