[A:270]mdzad pa la/ nang tshan du bzhi thog nas nyi shu rtsa lnga/ shar bas nyi shu rtsa lnga/ khang gsar chen mo bas nyi shu rtsa lnga ste/ lo bdun cu rtsa lnga'i rjes la si tu byang chub rgyal mtshan gyis sa mo glang nas sa'i bdag po mdzad nas/ lo nyi shu rtsa lnga pa chu mo glang la gu shrI bas yar klung chos 'khor mdzad/ de lo rang zhi bar gshegs pas phag mo gru pa la yang nyi shu rtsa lnga'i skeg byung zhes zer ro/ /sa skya pa'i bla ma gong ma rnams kyi ring la u rgyan gyi panTi ta shes rab gsang ba dang / phyis panTi ta dza ya se na la sogs pa panTi ta mang po'ang byon zhing / phyis 'phags pa rin po che'i ring la shong ston sku mched la sogs pa'i lo tsA ba shin tu mkhas pa yang mang du byung / tshad ma rnam 'grel gyi bshad pa yang dbus gtsang gi chos sde thams cad du dar ba ni/ bla ma chos rje ba'i drin yin/ 'phags pa rin po che thugs dgongs bzang pas/ bod kyi chos pa rnams rang rang gi chos lugs da yod la 'bad pa gyis zhes zer ba'i hor gyi 'ja' sa bsgrags/ sde snod 'dzin pa phal mo che zang zing gi longs spyod kyis kyang tshim par mdzad snang ngo / /rnal 'byor ma'i rgyud kyi bshad pa'i dar so dang / lam 'bras bu dang bcas pa'i gdams pa sa skya pa yab sras kyi ring la ji ltar 'phel ba'i gtam gyi skabs so/