[A:338]gro sa dang / spang sa dang / dge 'dun sgang dang / nyan lha sdings rnams btab/ rang lo drug cu rtsa dgu la spyil bur zhi bar gshegs/ dus g.yas 'khyil sogs rten ngo mtshar can yang mang du byon no/ /de rjes jo bo rnal 'byor dang / sna nam gza' dpal 'dren gyi sras lha lung gi dbang phyug ni/ sa pho stag la 'khrungs/ dgung lo brgyad bzhes pa'i tshe gu ri ba chen po la bsnyen gnas dang gtor chog la sogs pa'i lung zhus/ bcu bzhi pa la gu ri ba la dge bsnyen gyi sdom pa zhus/ bco lnga pa la rgya ngur gyi mkhan po klubs dkar dang / 'chims phu nas dge bshes gtsang pa khyung po spyan drangs te/ klubs dkar la slob dpon dang khyung po la mkhan po zhus nas bya sar rab tu byung / mtshan byang chub rin chen du btags/ kA ri kA yang gsan/ sum brgya pa tshar gnyis gsan pas mkhyen nas lo de nyid la sbu gu dor gsungs/ dge bshes bya 'chad kha ba'i sku 'bag gzigs pas shin tu dad pas/ 'di ji skad bya ba yin byas pas/ 'chad kha ba bya ba yin 'das zer/ da lta se bzhugs byas pas/ de la yang dad par byung ste spyan sngar byon/ grwa pa thams cad log nas spyil po cig brtsigs/ dgung lo nyi shu rtsa bzhi la se'i zhal nas/ dge slong gis gsung bas/ rgya sar sgang nas mkhan po glan gdan drangs nas mkhan po zhus/ slob dpon zhang gis las chog pa mdzad/ gnyags kyis gsang ste ba mdzad de bsnyen par rdzogs/ kha che paN chen la sogs pa'i bla ma mang du bsten/