[A:339]lha lung gi dbang phyug gis se spyil ba gshegs rjes/ lcags khyi nas chu 'brug gi bar lo bzhi bcu rtsa gsum gdan sa mdzad/ rang lo bdun cu rtsa lnga pa chu 'brug la gshegs/ byang chub kyi sems rlabs po che mnga' zhing / don yod zhags pa la sogs pa'i yi dam mang po'i zhal gzigs/ bka' 'gyur ro cog gi lung mnga' bas ni lung gi dbang phyug ces grags/ lha 'gro ba'i mgon po ni/ yab jo 'bag /yum lha 'bri sgang pa'i lcam mo lha gcig 'dzam gling gnyis kyi sras su me pho rta la 'khrungs/ lo drug lon pa'i tshe dkor 'dul ba 'dzin pa chen po la bsnyen gnas kyi sdom pa mnos/ bcu drug pa la 'chad khar khu bo'i thad du byon nas dge bsnyen gyi sdom pa mnos/ de'i mod la skyor mo lung du sbal til mkhan po dang gro sa pa'i dge bshes gnas brtan la slob dpon zhus te/ rab tu byung nas mtshan byang chub 'od du btags/ phyis po tor dge bshes gnas brtan la mkhan po dang / sbu gu do nas dge bshes rgyal tsha gdan drangs nas las kyi slob dpon zhus/ jo btsun pas gsang ste mdzad de bsnyen par rdzogs/ khu bo la chos mang du gsan/ khu bo gshegs nas chu sbrul la gdan sa mdzad de/ sa lug gi bar lo nyi shu rtsa bdun bzhugs nas bstan po'i bdag po mdzad de/ po to gnas brtan dang bka' gdams gzhung pa'i bshes gnyen rnams gros mdzad de/ po to sde ma lag dang bcas pa phul/ kong po nas rta bar/ sbu chu/ byang lung gsum gyi thog drangs pa'i sde pa sum brgya