[A:382]dmu rgod kyi sems can rnams kyi sgang bshongs snyoms pas shing rta de myur bor 'chag pa 'dug ces gsung ba byung zer/ byang chub sems dpa' skal ldan shing rta de ni sa pho rta la 'khrungs/ gtsug lag khang chen po bzhengs pa la sogs pa'i gzhan don gyi bya ba rlabs chen po mang du mdzad/ nam zhig gi tshe dge 'dun dbu chen kha cig bsags/ 'dun ma'i zhal bkod mdzad pa la/ de rnams kyis ma nyan bas/ dbon ston rin po che'i gsung gis/ dbu ru byang phyogs kyi bka' gdams kyi bstan pa 'di ngas gzung ngam snyam pa yin te/ nga khyed rnams kyi blo la mi 'bab na nga'i skya ma 'di de ring nas rtsen gyis bsdus pas chog gsung nas gzims mal du thegs/ ja sun gnyis bzhes pa'i mod la 'pho ba mdzad de/ rang lo bdun cu rtsa gsum pa lcags pho rta'i lo la gshegs/ lo 'di la kha che paN chen gyis sa skyar dbyar gnas mdzad/ sne'u zur pa gshegs pa'i tshe dgyer sgom chen pos lo nyi shu rtsa dgu lon/ dgyer sgom gshegs pa'i tshe dbon gyis lo sum cu rtsa bzhi bzhes/ dbon ston gyis gdan sar lo bzhi bcu rtsa gnyis bzhugs/ sang yon pas gdan sa lo sum cu rtsa gnyis bskyangs/ drug cu rtsa gcig la gshegs/ bde gshegs chen pos gdan sa lo nyi shu rtsa lnga bskyangs te/ drug cu rtsa lnga la gshegs/ skam dgon pa gzhon nu 'bum gyis gdan sa zla ba bco brgyad bskyangs te drug cu rtsa brgyad la gshegs/ sangs rgyas 'od 'byung gis gdan sa lo nyi shu rtsa lnga bskyangs nas drug cu rtsa gcig la gshegs/