[A:770]khyab pa 'khrungs/ slob dpon gnyags sgom la lo ro ba'i chos drug dang tshe sgrub zhus/ gnyags sgom de sum pa'i nye gnas yin/ de nas 'o de gung rgyal la byon pas bzhugs snying 'dod pa ma byung nas log nas/ kham bu ya le la gcod thun gcig ma zhus/ zwa ra bas phag mo grur khang pa rtsig pa'i mkhar las kyang mdzad/ khyod kyis lho nas shing drongs shig gsung ba la/ de ma grub pas zwa ra ba'i zhal nas/ khyod kyis ma drangs kyang nga'i shing 'dren pa'i stabs ma chag gsung / so drug pa shing byi la kha che paN chen bod du byon/ shambus yon bdag byed par khas blangs nas/ so brgyad pa me pho stag la g.yam bzangs btab/ de'i phyi lo me mo yos la zwa ra ba gshegs/ de nas tshogs pa bskyangs skabs shig tu rang nyid srong btsan sgam po yin pa dang / khra 'brug gi rtsigs lugs/ nor dang chos kyi gter sbas lugs la sogs pa mang po yang gsungs/ nga nyid lnga brgya tha ma'i tshe/ /bzhi brgya nyi shu rtsa lnga na/ /lho phyogs g.yor pa'i rgyal khams su/ /glang chen gser gyi lo la 'khrungs/ /mtshan ni dha rma pra Ni zhes/ /rgyal po 'di skad gsung zhes par/ /dam pa'i chos rnams 'chad par byed/ /ces gsungs pa de yang zhal du 'don/ chos kyi rgyal po 'di dgon pa btab rjes nas gnyal stod smad/ mtsho sna/ lho brag yar klungs shar nub rnams su yon bdag so sos chos 'khor gyi gtso bor gdan drangs te chos gsungs pa'i chos khri'ang lho brag tu bzhi bcu rtsa lnga/ gnyal du bzhi bcu