[A:776]lo'i spyan sngar byon nas/ los gtsos pa'i grwa de na bzhugs pa rnams la ja skol dang rnam bzhag bzang ba zhig kyang mdzad/ dbang yang zhus/ de rjes sum pa la gdams pa rnams zhus/ chos zhu res kyis ja re yang zhus pas/ dus phyis jas ma phongs gsung / sum pas gdams ngag thams cad tshang bar gnang / tshig res don mang po khrol ba'i thugs skyes pas phan pa yang che/ gdams pa kha tshang bar gnang bas da lta 'dzam bu'i gling na gdams pa nga rang las che ba med snyam pa yang byung / sum pa la gdams pa zhu bar bcugs pa'i mtshan mo cig mnal lam du mi dkar po cig byung ba na re/ da ste lo lnga na khyod kyi don grub 'ong bar 'dug zer byung / gzhan yang bur sgom dang byar bo pa la sogs pa'i bu chen gzhan rnams la'ang gdams pa 'ga' re zhus/ de nas dgung lo sum cu rtsa brgyad pa shing mo bya la dam pa sum pa'i gsung gis/ da khyed bzhud/ nged kyi gnyal 'di srin po ltogs gri shi ba'i lung pa yin gsung / de nas lo de nyid la phag mo grur byon pas dgun tshes bco brgyad kyi nyi ma ldog gdong cig la 'gro ba'i mgon po chos khri la phebs pa dang mjal/ der dad pa tshad med pa skyes/ shing dang bya 'di rnams kyang sprul ba kho na yin la che snyam pa byung / 'gro ba'i mgon po de rnal 'byor ba gza' mir byas pa la ye mi dgyes pa la/ gling ras la shin tu dgyes par byung / der 'gro ba'i mgon pos khrid gnang / dam bca' can gyi mtshams byas nas bsgoms