[A:776]ལོའི་སྤྱན་སྔར་བྱོན་ནས། ལོས་གཙོས་པའི་གྲྭ་དེ་ན་བཞུགས་པ་རྣམས་ལ་ཇ་སྐོལ་དང་རྣམ་བཞག་བཟང་བ་ཞིག་ཀྱང་མཛད། དབང་ཡང་ཞུས། དེ་རྗེས་སུམ་པ་ལ་གདམས་པ་རྣམས་ཞུས། ཆོས་ཞུ་རེས་ཀྱིས་ཇ་རེ་ཡང་ཞུས་པས། དུས་ཕྱིས་ཇས་མ་ཕོངས་གསུང༌། སུམ་པས་གདམས་ངག་ཐམས་ཅད་ཚང་བར་གནང༌། ཚིག་རེས་དོན་མང་པོ་ཁྲོལ་བའི་ཐུགས་སྐྱེས་པས་ཕན་པ་ཡང་ཆེ། གདམས་པ་ཁ་ཚང་བར་གནང་བས་ད་ལྟ་འཛམ་བུའི་གླིང་ན་གདམས་པ་ང་རང་ལས་ཆེ་བ་མེད་སྙམ་པ་ཡང་བྱུང༌། སུམ་པ་ལ་གདམས་པ་ཞུ་བར་བཅུགས་པའི་མཚན་མོ་ཅིག མནལ་ལམ་དུ་མི་དཀར་པོ་ཅིག་བྱུང་བ་ན་རེ། ད་སྟེ་ལོ་ལྔ་ན་ཁྱོད་ཀྱི་དོན་གྲུབ་འོང་བར་འདུག་ཟེར་བྱུང༌། གཞན་ཡང་བུར་སྒོམ་དང་བྱར་བོ་པ་ལ་སོགས་པའི་བུ་ཆེན་གཞན་རྣམས་ལའང་གདམས་པ་འགའ་རེ་ཞུས། དེ་ནས་དགུང་ལོ་སུམ་ཅུ་རྩ་བརྒྱད་པ་ཤིང་མོ་བྱ་ལ་དམ་པ་སུམ་པའི་གསུང་གིས། ད་ཁྱེད་བཞུད། ངེད་ཀྱི་གཉལ་འདི་སྲིན་པོ་ལྟོགས་གྲི་ཤི་བའི་ལུང་པ་ཡིན་གསུང༌། དེ་ནས་ལོ་དེ་ཉིད་ལ་ཕག་མོ་གྲུར་བྱོན་པས་དགུན་ཚེས་བཅོ་བརྒྱད་ཀྱི་ཉི་མ་ལྡོག་གདོང་ཅིག་ལ་འགྲོ་བའི་མགོན་པོ་ཆོས་ཁྲི་ལ་ཕེབས་པ་དང་མཇལ། དེར་དད་པ་ཚད་མེད་པ་སྐྱེས། ཤིང་དང་བྱ་འདི་རྣམས་ཀྱང་སྤྲུལ་བ་ཁོ་ན་ཡིན་ལ་ཆེ་སྙམ་པ་བྱུང༌། འགྲོ་བའི་མགོན་པོ་དེ་རྣལ་འབྱོར་བ་གཟའ་མིར་བྱས་པ་ལ་ཡེ་མི་དགྱེས་པ་ལ། གླིང་རས་ལ་ཤིན་ཏུ་དགྱེས་པར་བྱུང༌། དེར་འགྲོ་བའི་མགོན་པོས་ཁྲིད་གནང༌། དམ་བཅའ་ཅན་གྱི་མཚམས་བྱས་ནས་བསྒོམས་