[A:877]lam rtsol med du zin/ so brgyad pa la snga sor zhu yig cig btang nas 'jag chen byams pa dpal ba la mjal/ gdams pa ma lus par zhus/ rgyab skyor gyi lung rnams slob dpon dpal bzang pa la zhus te/ phyis gnas rnying dang yol du bzhugs/ phal cher sku mtshams mdzad/ lnga bcu rtsa brgyad pa sa pho byi ba'i lo skar ma bya sbos nya ba'i tshes bcu bzhi la mya ngan las 'da' ba'i tshul bstan/ spur bzhu bas ring bsrel dpag tu med pa byon no/ /mdor na skyes bu dam pa 'di ni rtses thang btab pa'i lo la 'khrungs pa yin la/ mkhas grub shangs ston 'khrungs nas ding sang gi me pho spre'u yan la lo nyis brgya dang bzhi bcu rtsa gsum 'das so/ /sangs rgyas ston pa'i slob ma mkhas btsun gzhon nu grub ces bya ba de ni/ myang smad gcung ba yu ba gdong du yab rgyal po che 'phel dang / yum rgya mo khye 'dren dpal zhes bya ba gnyis kyi sras su 'khrungs/ lo bcu lon pa na snar thang gi mkhan chen nam mkha' grags kyi drung du rab tu byung zhing / chu mig pa la sogs pa'i drung du sde snod la mkhas par sbyangs/ lo nyi shu lon pa na mkhan chen de nyid la bsnyen par rdzogs/ lo nyi shu rtsa gnyis tsam lon pa na/ sa skyar bla ma 'phags pa'i spyan sngar byon nas rgyud kyi bshad pa mang po gsan/ gdan sa na bzhugs pa'i dge bshes chen po gzhan rnams la'ang rgyud sde mang po gsan zhing mkhas par mkhyen nas