[A:889]zhal nas/ byang phyogs shambha la na sangs rgyas kyis gsungs shing lung bstan pa'i rgyud 'grel mang po bzhugs pas de tshol zhing nyan du song zhig gsung nas/ der bzhud par dgongs pa dang / de'i tshe kha cig na re/ tshong pa dang sdebs nas gshegs so zhes zer/ kha cig na re sprul pa'i dge slong cig gis khrid do zhes zer zhing / kha cig ni rje btsun ma nyid kyis rjes su gzung zhes zer zhing smra'o/ kha cig na re/ der bzhud par bzhed nas chas pa dang dag pa'i snang ba la shambha la nyid du byon nas spyan ras gzigs dngos la chos rnams zhus so zhes gsung ba'i bzhed pa tha ma 'di gzung ngo / de nas yul dbus su bzhugs te paNDi ta lnga la gsungs te/ biNta A tsarYa/ 'dul ba 'byung gnas blo gros/ thar pa 'byung gnas sbas pa/ seng ge rgyal mtshan/ mtha' yas rnam par rgyal ba zhes bya'o/ /de dag gis shes pa dang puShpa ha rir gshegs nas nA ro paN chen la sogs pa la gsung zhing bzhugs so/ /slob ma 'di dag rnams kyang phun sum tshogs pa du ma dang ldan pa las/ khyad par du yang binTo A tsarYa zhes pa 'di mchog tu gyur pa ste/ de'i 'thad pa yang / 'di nyid thog mar dge slong blo rtul ba zhig yin pa las/ blo rno ba'i ched du sgrub pa mdzad pa las lhas bstan pa'i rmi lam la brten nas/ byu ru la ku ru kulle'i sku zhig mdzad nas bud med kyi ro zhig gi khar bcug pa'i steng du skyil mo dkrung bcas nas zhag bdun du bsgrubs pas/ gyen du bltas nas khyod ci 'dod ces zer ro/ /