[A:890]de'i dus na mthong tshad zin par 'dod ces smras kyang de ltar 'byung ba las/ sngar gyi blo rtul ba'i stobs kyis zhu ma nus/ bris kyis zin pa thams cad blo la zin par 'dod do zhes smras pas/ de ltar byung nas panTita bindo A tsarYa zhes bya ste/ yul dbus su ngag gi dbang phyug grags pa zhes bya ba paN chung bcu gnyis kyi bskor ba zhig tu gyur to/ /des slob dpon dus zhabs pa la chos gsan pas thams cad kyang lan res 'dzin nus par gyur te/ de'i brgyud pa 'dzin pa ni dge bsnyen byang chub ces bya ba ste/ 'di la sras paNDi ta shin tu che ba zhig yod pa las/ des ni yab kyi mched po dgon pa ba la yang zhus shing / nA ro pa dang stabs shig tu dus zhabs pa chen po la mnyan pas dus zhabs chung ngu zhes kyang grags te/ yab sras gnyis la 'dod pa mi mthun pa yang yod par snang ngo / /de lta bu'i yab sras gnyis kyis dpal dus kyi 'khor lo mi shes na gsang sngags mi shes so zhes smra zhing yul dbus su bzhugs pa las/ paNDi ta thams cad ma rangs nas yul dbus su 'dus te/ bi kra ma shrI lar khri bcas nas rtsod pa byas pas/ jo bo chen po de ma thub/ thams cad kyis khri bor zhing zhabs spyi bor blangs nas/ dA byang chub sems dpa' ma gtogs pa thams cad kyis dus kyi 'khor lo ma zhus pa med de/ mtshan yang dus 'khor ba zhes grags nas shin tu dar rgyas su mdzad do/ de'i tshe kha che'i yul na bram ze zhabs bzang po zhes kyang bya/ surYa ke tu zhes kyang bya/ mkhas pa'i phul du phyin pa de