[A:901]lags byas pas/ de las nga la yang med/ da gzhan la ster ri gna' skyol gsung nas mgul la phreng ba bcug der bla mas gnang ba ni ma lags byas pas/ ngan pa 'di gsung nas dbu la bye ma par ba gang rgyab/ re zhig na da 'o na khyod kyis gzhan la ston la mgo lus tshang bar byin cig ces rjes su gnang ba'ang 'thob/ de bzhin du yu mos kyang paNDi ta la zhus pa na khres po bstan nas 'di bal yul du skyol phyis ster gsung ba la/ yang grogs kyis gros btab ste sgro ston la zhus/ sgro ston gyis rgyud 'grel man ngag dang bcas pa dang / sgron gsal man ngag dang bcas pa gnang / de nas 'u yug tu byon nas bsgoms pas grub pa yang brnyes/ slob ma khyad par can yang byung ste brgyad cu rtsa gnyis la gshegs so/ de la slob ma wa brag dkar ba bya ba dang/ gnyal pa gro bya ba gnyis kyis bka' gdams la 'dag 'byar yun ring du byas nas/ phyis bla ma chen po'i drung du 'ongs te gdams ngag bsgoms pa'i zhag dang po la rtags thams cad rdzogs te/ lam gyi mchog tu nges pa rnyed/ bsgoms pas mngon par shes pa rgya chen po dang yang ldan no/ gnyos skyi khung ba bya bas ni/ lo bdun cu lon nas bla ma chen po la gtugs/ des ngor rje la gsungs/ des dol ba 'gar ston dbang phyug grub la gsungs so/ /grub thob dharma bo dhi yang yu mo'i slob ma yin la/ tre bo mgon pos gzhung gdams ngag thams cad mnos nas rgya cher bshad cing / de'i rgyun yang rim pa mang du byung ngo /