[A:905]mang po la mkhas par sbyangs/ rkyang 'dur gyi chos grwar grwa pa yang mang du bskyangs/ rtsod pa yang shin tu bzang bar grags/ 'chad nyan gyi skabs shig tu kun mkhyen chos sku 'od zer ba la dus 'khor gyi bshad pa rdzogs par gsan/ man ngag zhus nas bsgoms pa'i tshe ting nge 'dzin mang po'i sgo bye/ skabs shig tu srog gegs byung ba kun mkhyen pas mkhyen nas spyan ma drangs pa byon/ kun mkhyen pa'i gsung gis/ da lan grongs na khyed rang sku bzhi la 'byor 'gro ste/ gdul bya mang po'i don du bzhugs dgos pas gsung nas srog gegs de bsal/ de nas 'chad nyan gyi spros pa dor te gcig tu bsgom pa la gzhol bas kun spangs par grags/ bod na sbyor drug mi 'dra ba yod zer tshad la yang gsan pa mdzad/ byang gi ri brgyud rnams la 'dug sa spo zhing bsgoms pa'i tshe thugs dam gyi stobs kyis mi ma yin mang po dbang du 'dus/ khyad par jo mo nags rgyal gyis jo nang du spyan drangs pas lo gsum na 'byon par zhal gyis bzhes te/ dus la bab pa na byon nas dgon pa btab/ bshad pa dang gdams pa gnyis ka'i slob ma yang mang du bskyangs/ de dag gi nang nas byang sems rgyal ba ye shes/ la stod pa dbang rgyal/ mun me brag kha ba/ sron ba kun rgyal rnams la kun spangs pa'i bu bzhi zhes grags/ byang sems rgyal ye ba ni/ me mo sbrul la 'khrungs/ chung ngu'i dus su kar ma pa shis pha de mi 'dod bzhin du blangs nas kar ma ba'i chos rnams dang zang zing gis kyang bskyangs/