[A:926]ma'i mchog ni rje btsun man lungs pa chen po ste/ de ni sa mo phag la 'khrungs nas lcags pho byi ba'i lo la rdo rje gdan du byang chub chen po'i drung du nyi ma re la 'bras nyag ma re dang / chu thigs pa re las mi gsol ba'i dam bca' mdzad nas lung bstan bsgrubs pas/ zhag bcu gnyis na gnas pos mgo la chu blugs pa tshor ba tsam byung / bco brgyad pa'i tshe byang chub chen po'i zhal nas/ rigs kyi bu po ta la'i ri bor song la/ byang chub sems dpa' spyan ras gzigs kyi drung du byang chub sems dpa' rnams dang tshangs pa mtshungs par spyod cig ces pa'i lung bstan byung bas langs te lho phyogs su byon/ dpal 'bras spung gi mchod rten du bzhugs pa na zhabs la seng ldeng gi tsher ma zug pas khrag mang po 'dzags/ de sos pa na mchog tu mi 'gyur ba'i bde ba yang dag par brnyes/ de nas rgya gar ba'i rnal 'byor pa'i cha byad kyis rgya mtsho'i steng na phar sa la bya ba bzhin du mdzad nas po ta lar gshegs so/ gzhan bla ma 'phags pa dang / rin po che khro phu ba dang / lho pa grub seng dang / thang ston lo tsA ba la sogs pa'i mkhas grub mang du byung ngo / /sras kyi thu bo rgya gar grags pa/ rab tu byung ba'i mtshan blo gros nam mkha' dpal gyis dus 'khor la sogs pa yab kyi yon tan rnams phal cher thugs su chud nas dben dmar gyi gdan sa gzung / gtsug lag khang brtsigs/ chos kyi bya ba rgya chen po mdzad nas 'das so/ /sras gnyis pa shes rab seng ge lcags mo phag la 'khrungs/