[A:934]ta ratna zhes bya bas slob dpon mdzad de rab tu byung zhing dge tshul gyi bslab pa mnos/ mkhan slob de gnyis dang mkhas pa gzhan las kyang rig pa'i gnas mang po la sbyangs/ mkhan po las byang chub mchog tu sems bskyed/ zab mo'i dbang dang man ngag du ma gsan/ dgung lo nyi shu bzhes pa na sngar gyi mkhan slob las bsnyen par rdzogs/ de nas bya bral la gshegs te singgha'i gling du byon/ der lo drug tu bzhugs/ gnas dang rten khyad par can du ma mjal/ byin brlabs kyi cho 'phrul ngo mtshar ba mang du byung / slob dpon chos kyi grags pa zhes bya ba la 'dul ba lung dang 'od ldan sogs kyang gsan/ gtso bor thugs dam 'ba' zhig snying por mdzad/ de nas dzambu'i gling du 'byon khar sangs rgyas gangs chen mtsho'i zhal gzigs/ mu stegs kyi gnod pas ma tshugs par rgya gar lho phyogs su ka lingka'i rgyal khams su phebs/ der paNDi ta chen mo mi'i nyi ma zhes bya ba dzambu'i gling na mkhas par grags pa des/ gnas brtan chen po nags kyi rin chen ni/ /srid skyes nyon mongs rnyog pa rab bkrus nas/ chags bral mngon du mdzad do skyes bo dag srid pa zhi phyir gus pas bsten par gyis/ /zhes bya ba'i bstod pa mdzad cing zhabs tog kyang mang du mdzad nas slar dpal 'bras spung gi mchod rten chen por byon/ de na klu'i byang chub kyi dgon pa zhig yod par thogs shig bzhugs/ dpal sha ba ri dbang phyug dang thog mar mjal/ de nas ma ga dhar phebs pa na