[A:935]phyi rol pa'i paNDi ta ha ri ha ra zhes bya ba las ka lA pa bod du grags pa 'di bas bdun 'gyur gyis che ba zhig yod pa de yang gsan/ phal cher yan lag drug gi rnal 'byor la brtse gcig pa'i sgrub pa mdzad cing / khyad par ka nag shro ti zer ba'i chu bo'i pha rol gyi nags su lo gsum phyogs gsum gyi nges pa mdzad/ thugs dam mchog tu gyur cing uru bA sa zhes bya ba'i gtsug lag khang du rnal 'byor dbang phyug bi rU bA kSha dang / de'i slob ma grub thob pA gha la dang mjal/ de na 'phags pa spyan ras gzigs kyi rdo'i sku cho 'phrul can zhig yod pa des bod yul du song zhig /rgyal po zhig la brten nas mang po la phan par 'gyur ba'i lung bstan byung ba bzhin dang por bal por phebs/ der paNDi ta chen po shI la sA ga ra las byang chub sems dpa'i spyod pa la 'jug pa'i lugs kyi byang chub mchog tu sems bskyed pa gsan/ me pho rta'i lo la bod du phebs/ lha sa dang yar klungs su yang yud tsam phebs te chos zhu ba cher ma byung / slar bal yul du thegs/ der 'phags pa shing kun shAnta bU ri'i gtsug lag khang du bzhugs pa'i tshe dang por bla ma sangs rgyas dbyangs byon/ de nas dpal sha ba ri dbang phyug byon nas der dkyil 'khor gyi 'khor lo sprul/ spyir bde mchog gi dbang bskur gnang / bye brag tu zab mo'i dbang phyi ma la brten nas mi 'gyur ba'i bde ba brnyes/ slar yang si tu rab bstan pas bod rgyal ba zhes bya ba pho nyar btang ste spyan drangs nas rgyang rtser phebs/