[A:93]zhi ba'i nags tshal der/ /sdom brtson ldan pa brtse ldan slob ma'i tshogs/ /de la 'grogs na bde ba de dag dang / lhan cig dge ba'i phyogs la brtson par gnas/ dus gzhan zhig na brgya byin la sogs pa 'dod pa khams kyi lha'i gtso bo dang 'khor du ma bcas pa mang po mtshan mor lhags te/ mchod pa byas nas chos nyan pa'i phyir 'khod pa dang / bla chen pos kyang chos dang ldan pa'i gtam gyis de dag yid tshim par mdzad do/ /yang de dag na re/ btsun pa khyod ni bzang na mi ma yin pa'i 'khor 'di dag ni ngan no zer nas song ngo / /'khor rnams kyis zhus pa/ mdang snang ba 'di lta bu snang bas/ bla chen po de ni nges par sprul pa lags sam zhus pas lan du/ /sprul pa ma yin gyi/ bdag ni theg pa chen po la zhugs pa'i sbyor ba'i lam pa snang ba thob pa la zhugs pa'i ban de dge ba gsal yin zhes gsungs/ yang skabs gzhan du/ dang po bud med sgog 'tshong ma/ /bar du stag sna khri sum rje/ /tha ma mu zu dge ba gsal/ /zhes kyang gsungs so/ /de ltar bla chen pos lo bzhi bcu rtsa dgu la dan tig tu byon/ lo sum cu rtsa lnga dan tig tu bzhugs/ brgyad cu rtsa bzhi pa shing mo phag gi lo la dga' ldan du gshegs/ shing phag 'di bstan pa bsnubs pa'i lcags bya nas bdun cu rtsa lnga pa yin/ de ltar bla chen po'i zhal nas/ 'phags pa thogs med dang btsun pa mche ba'i sde gnyis kyis rgyal ba'i yum gyi dgongs pa mi 'dra ba bkral ba de/ kho bos