[A:950]zhus lan dang bcas te rgya cher stsal bas/ nges pa mtha' dag thugs su chud de phyogs 'dir dus kyi 'khor lo la lhag par bka' drin du gyur/ phyis rje thams cad mkhyen pa byams pa gling ba chen po'i zhal snga nas dang / dpal karma pa zhwa dmar cod pan 'dzin pa bzhi pa las kyang dbang lung gdams pa bshad pa mang po gsan te/ bla ma mkhas shing grub pa brnyes pa sum cu tsam nye bar bsnyen pa las/ mang du thos pa rgya mtsho'i pha rol du son te mkhas pa'i grags pas sa thams cad du khyab par gyur to/ /bzhi pa bsnyen par rdzogs pa dge slong gi dngos po brnyes pa ni/ dgung lo nyer gnyis pa'i thog tu/ kha che paN chen gyi sdom brgyud dri ma med pa tshogs chen pa'i mkhan chen don grub dpal bas mkhan po/ las kyi slob dpon rje 'gos lo tsA ba gzhon nu dpal/ gsang ste ba chen po dpal 'byor ba ste/ dge 'dun nyi shu'i tshogs kyi dbus su zhugs pa yongs su rdzogs pa dge slong gi dngos po brnyes te/ 'phags pa dgyes pa'i tshangs par spyod pa mchog dang yang ldan par gyur to/ /lnga pa bsam pa las byung ba'i mkhyen rab kyi sgo phye ba ni/ sngon du gsan pa rgya chen po rnams mdzad pa'i dus de dang der yang thos tsam ma yin par tshig don du ma'i sgo nas rnam par brtags shing dpyad la/ bla ma rnams kyi drung du zhus shing gtan la 'bebs pa dang / mkhas par grags pa rnams dang brtsod cing brgol ba la sogs pa'i sgo nas gsung rab