[A:951]mtha' dag gi dgongs pa dpyis phyin par thugs su chud par mdzad pa/ gzhan yang rtses thang / bsam gtan gling / pho brang 'um bu bla mkhar/ rgyal bzangs/ bsam yas 'chims phu/ khrims khang gling / brag lha klu phug la sogs par sku mtshams kyi nges pa la bzhugs nas/ bka' 'gyur la sogs pa'i gsung rab mtha' dag gi gzigs pa stsal ba dang / de dag gi tshig don gyi cha rnams kyang legs par bsams byung gi ngo bor bskyed par mdzad de/ dpal rtses thang na bzhugs pa dang / las stod byang na bzhugs pa'i bstan 'gyur kyang lan gnyis dang / bu ston zhabs dang / de nyid 'dus pa sogs bod yig ji snyed pa sogs/ mdor na gang du thegs pa'i sa phyogs de na gsung rab che phra ci dang ci bzhugs pa thams cad la gzigs pa stsal bas/ shes bya'i gnas mtha' dag gi nor bus yongs su gang ba'i blo gros kyi rgya mtsho nyin re zhing ches cher 'phel bas/ thar pa la re ba brtas pa rnams gtso bor gyur pa'i yid can mtha' dag gi re ba yid bzhin du skong ba'i rin po che dbang gi rgyal po lta bu'i thams cad mkhyen pa chen por gyur to/ /drug pa byin rlabs kyi stobs kyis dbugs dbyung ba ji ltar brnyes pa ni/ mchog gi dngos grub brnyes pa'i tshul bstan pa ste/ de yang dam pa 'di ni sa chen po la bzhugs pa'i sems dpa' chen po mngon par byang chub pa'i go 'phang mngon par brnyes bzhin pa nyid bsam bzhin du skye ba'i cho 'phrul ston par mdzad pa nyid las/