[A:984]zag dang chos kyi dbye bas bdag tu lta ba rnam pa gnyis yod/ de las nyan thos dang rang sangs rgyas rnams kyi gang zag tu lta ba spangs pas yang srid kyi rgyun dang bral ba'i yid brtan pa'i thar pa thob par 'gyur/ blo dang ldan pa'i byang chub sems dpa' rnams kyis bdag nyid gcig pu thar bar byas na/ gal te gcig thar byed na de las khrel bor med/ /ces gsungs pa'i tshul gyis sems can gyi thar pa'i thabs btsal dgos/ de'i thabs ma lus par mkhyen pa yang sangs rgyas las gzhan pa med pas/ shes bya'i sgrib pa spang ba'i phyir chos kyi bdag tu lta ba spang dgos par gzigs nas/ lta ba de spang pa'i phyir 'bad dgos la/ de yang stong pa nyid rtogs pa'i lta bas chos su lta ba spong ste/ de yang 'dzin stangs 'gal ba'i sgo nas spong ba yin no/ /stong pa nyid kyi lta ba bskyed pa'i phyir yang lung dang rigs pa'i rgya mtshor 'jug par byed do/ /phyag rgya chen po'i ye shes ni 'dzin stangs 'gal bas spang bar bya ba'i gnyen po rigs pa'i stobs kyis rnyed pa'i rjes su dpag pa'i tshad ma yin na/ rjes su dpag pa ni rnam par rtog pa kho na yin la/ rnam par rtog pa yin phan chad ma rig pa yin par dpal chos kyi grags pas bzhed de/ de spong ba la ni 'dzin stangs 'gal ba'i gnyen po med de rjes su dpag pa'i tshad ma dang 'dzin stangs 'gal na phyin ci log kho nar 'gyur ba'i phyir ro/ des na lta bar ma gyur pa 'di'i gnyen po ni phyag rgya chen po'i ye shes yin la/ de ni bla ma dam pa'i byin rlabs nyid las 'byung ba yin no/ zhes bya ba ni bstan pa spyi'i rim pa'o/
/'dir