[A:985]chos rje rgod tshang ba'i zhal nas/ rgyal ba shAkya thub pa'i bstan pa 'di la phyag rgya chen po zhes lam phul du phyung bar mgo 'don mkhan bram ze chen po sa ra har gda' ba bu/ de'i lugs 'dzin pa rgya gar na rje ri khrod zhabs yab sras yin/ zhes gsungs pa ltar/ yab ri khrod zhabs kyi lugs sras mai tri bas gzung nas slob ma rnams phyag rgya chen po'i lam la bkod pa las 'dzam bu'i gling du khyab par gyur pa yin no/ /de yang phyag rgya chen po stod lugs pa rnams kyi mai tri pa lug gi lo bar bzhed la/ rje ras chung ba'i lugs kyis khyi'i lo par bzhed cing bdun cu rtsa brgya pa la mya ngan las 'das par bzhed do/ ji ltar yang lugs gnyis kas/ mai tri pa ni/ dang por phyi nang gi grub mtha' phal che ba la mkhas par gyur kyang / des thugs ma tshim par 'bad pa du mas dpal sha ba ri dbang phyug btsal te/ des byin gyis brlabs shing gsung gis snang bar byas pas/ snying po'i don mngon sum du rtogs par gyur nas dran pa med cing yid la byed pa med pa la sogs pa'i tshul smras pas mkhas pa chen po shAnti pa ma rangs par gyur nas brtsad pas mai tri ba rgyal bar gyur te/ de phyin chad ni rgyal ba mai tri ba zhes grags so/ /de la slob ma mang du yod kyang gtso bo ni che bzhi/ 'bring bdun/ chung ba bcu ste nyi shu rtsa gcig tu grags so/ che ba bzhi ni/ na te ka ra/ de ba A ka ra tsandra/ ra ma pA la/ phyag na rdo rje dang bzhi'o/ /na te ka ra ni mu stegs pa'i dus kyi ming ste/ phyis ni lhan cig skyes pa'i rdo rje'o/ /de ba A ka ra tsandra ni mtshan gzhan stong nyid