[A:༡༦༠བ]ཆེན་ཀུཀྐུ་རི་པའི་བཀའ་སྲོལ་ཞི་བ་སྦས་པ་ཡབ་སྲས་ལ་བརྒྱུད་མཁས་གྲུབ་ཆེན་པོ་ཀུན་དགའ་སྙིང་པོ་ལ་བཀའ་བབས་པའི་མ་ཧཱ་མཱ་ཡཱ་གཙོ་རྐྱང་གི་བྱིན་རླབས་སྒྲུབ་ཐབས་རིན་འབྱུང་ལྟར་ཐོབ་པའི་བརྒྱུད་པ་ནི། དཔལ་ཧེ་རུ་ཀ མཁའ་འགྲོ་མ། ཀཀྐུ་རི་པ། དྷརྨ་པ། བྱཱ་ད་ལི་པ། ཨ་སི་ཏ་གྷ་ན། རཱ་ཏི་གུཔྟ། ཤཱནྟི་གུཔྟ། གྲུབ་ཆེན་བུདྡྷ་ནཱ་ཐ། རྗེ་བཙུན་ཆེན་པོ་ཀུན་དགའ་སྙིང་པོ། རྗེ་རིན་ཆེན་རྒྱ་མཚོ་སོགས་གོང་ཁ་པཎ་སྒྲོལ་མ་དང་འདྲ། ལུང་ལ། རིན་འབྱུང་ལས་བྱུང་བའི་སྒྲུབ་ཐབས། དྲན་པ་གཅིག་པའི་རྣལ་འབྱོར་བདེ་ཆེན་མྱུར་སྒྲུབ་རྗེ་བཙུན་གྱིས་མཛད་པ་གཉིས་དེ་ཉིད་ཀྱི་གསུང་འབུམ་ལྟར་རོ། །
༈ གྲུབ་པའི་སློབ་དཔོན་སྒེག་པའི་རྡོ་རྗེས་བཀྲལ་བའི་དཔལ་གསང་བ་འདུས་པ་ལྷན་སྐྱེས་ཀྱི་རྗེས་གནང་རིན་འབྱུང་ལྟར་ཐོབ་པའི་བརྒྱུད་པ་ནི། མི་བསྐྱོད་རྡོ་རྗེ། རཱ་ཧུ་ལ་ཤྲཱི་སོགས་གོང་ཤཱཀ་ཤྲཱིའི་སྒྲོལ་ལྗང་དང་འདྲ། ལུང་ལ། གསང་བ་འདུས་པ་ལྷན་ཅིག་སྐྱེས་པའི་སྒྲུབ་ཐབས་སྒེག་པའི་རྡོ་རྗེས་མཛད་པ་ཁྲོ་ལོའི་འགྱུར། རིན་འབྱུང་ལས་བྱུང་བའི་སྒྲུབ་ཐབས་ཏེ་གོང་ཁྲོས་མ་དམར་མོ་དང་འདྲ།