[A:༡༧༣བ]ལུང་ལ། ཀླུའི་དབང་ཕྱུག་རྒྱལ་པོའི་སྒྲུབ་ཐབས་སློབ་དཔོན་ཀླུ་སྒྲུབ་ཀྱིས་མཛད་པ་ལོ་ཆེན་རིན་བཟང་གི་འགྱུར། སྒྲུབ་ཐབས་རྩ་བ་བཅོམ་ལྡན་རལ་གྲིས་མཛད་པ། བསྟོད་པ་རྣམ་པར་རྒྱལ་བའི་དབྱངས་ཀུན་མཁྱེན་རོང་སྟོན་གྱིས་མཛད་པ་རྣམས་གསེར་པོད་ལྟར། སྒྲུབ་ཐབས་ངག་དབང་མཆོག་ལེགས་རྡོ་རྗེས་མཛད་པ། སྒྲུབ་ཐབས་དང་རྗེས་གནང་བྱ་ཚུལ་གོ་བདེ་དོན་ཚང་གསལ་བའི་སྒྲོན་མེ་རྨོར་ཆེན་གྱིས་མཛད་པ། བསྙེན་ཐབས་བྲིས་སྐུའི་དམིགས་བསལ་དང་བཅས་པ་སངས་རྒྱས་ཕུན་ཚོགས་ཀྱིས་མཛད་པ། ཀླུ་གཏོར་བསྡུས་པ་བཅས་གོང་རྗེས་གནང་དང་འདྲའམ་སྙམ།
༈ དགེ་བའི་བཤེས་གཉེན་བཀའ་གདམས་པ་རྣམས་ཀྱི་ཐུགས་དམ་ལྷ་བཞིར་གྲགས་པའི་རྗེས་གནང་ཐམས་ཅད་མཁྱེན་པ་ངག་དབང་ཆོས་གྲགས་ཀྱི་ཡིག་སྟེང་ནས་ལེགས་པར་ཐོབ་པའི་རིམ་པ་ལ། དང་པོ་བྱ་རྒྱུད་དེ་བཞིན་གཤེགས་པའི་རིགས་ཀྱི་གཙོ་བོ་ཐུབ་པ་རྡོ་རྗེ་གདན་པ་གཙོ་འཁོར་གསུམ་གྱི་བརྒྱུད་པ་ནི། ཐུབ་པའི་དབང་པོ། མ་ཧཱ་པཎྜི་ཏ་དཱི་པཾ་ཀ་ར་ཤྲཱི་ཛྙཱ་ན། ལོ་ཙཱ་བ་ནག་ཚོ་ཚུལ་ཁྲིམས་རྒྱལ་བ། རོང་པ་ཕྱག་སོར་བ། བྱ་འདུལ་བ་འཛིན་པ། མཁན་པོ་ཆོས་ཀྱི་བྱང་ཆུབ།