[A:༢]འོད་གསལ་ལྷ་དང་འཁོན་སྟོན་ས་སྐྱ་པའི་གདུང་རབས།
གཟུགས་ཁམས་ལྷ་གནས་གསུམ་པ་འོད་གསལ་ནས།
སྤྱི་རིང་གཡུ་རིང་གཡུ་སེ་མཆེད་རྣམ་གསུམ།
འཛམ་གླིང་མི་ཡུལ་སྤྱི་དང་གངས་ལྗོངས་པའི།
བསོད་ནམས་མགྲོན་དུ་བྱོན་པའི་གཅུང་པོ་ལས།
སྲས་བཞི་བྱོན་པ་ཡབ་བཅས་ལྷ་ཡུལ་གཤེགས།
བར་པ་གཡུ་རིང་དམུ་བཟའ་ཡབ་ཡུམ་ལས།
སྲས་མཆོག་མ་སངས་སྤུན་བདུན་གཅེན་པོ་དྲུག།
ཡབ་བཅས་ལྷ་ཡུལ་གཤེགས་ཤིང་བདུན་པ་ནི།
མ་སངས་སྤྱི་རྗེ་ཐོག་ལྕམ་འུར་མོའི་སྲས།
དཔའ་བོ་སྟག་དང་ཀླུ་ལྕམ་དྲ་མའི་སྲས།
སྟག་པོ་འོད་ཅན་འདི་རྣམས་བར་སྣང་བཞུགས།
དེ་དང་མོན་བཟའ་མཚོ་མོ་རྒྱལ་གྱི་སྲས།
གཡའ་སྤང་སྐྱེས་གཅིག་བྱོན་རྣམས་ལྷའི་གདུང་རབས།
གང་དེས་སྲིན་པོ་སྐྱ་རེངས་ཁྲག་མེད་བསད།
ཆུང་མ་གཡའ་འབྲུམ་འཕྲོགས་བཞེས་ལྷ་སྲིན་འཁོན།
བར་དུ་བྱུང་བས་སྲས་ནི་འཁོན་བར་སྐྱེས།
དེ་དང་བསྟན་བཟའ་ལྕམ་བུ་སྒྲོན་གྱི་སྲས།
དཀོན་པ་རྗེ་གུང་སྟག་གམ་དཔལ་པོ་ཆེ།