[A:༣]འདི་ཡན་བོན་ལུགས་རྗེས་འབྲངས་ཡིན་ནམ་སྙམ།
དེ་དང་རླངས་བཟའ་ནེ་ཆུང་མ་ཡི་སྲས།
ཀླུ་དབང་གཅེན་དང་རྡོ་རྗེ་རིན་ཆེན་གཅུང།
ཕྱི་མའི་ལྕམ་མོ་འགྲོ་བཟའ་གཡང་ལེན་སྐྱིད།
བཞེས་པར་སྲས་བདུན་བྱོན་པའི་གཅེན་དྲུག་ལས།
ཆེ་བ་མང་ཡུལ་དེ་འོག་གུང་ཐང་དང།
དེ་འོག་སྲད་དང་དེ་འོག་གཉལ་ལོ་རོ།
དེ་འོག་མྱང་ཤབ་བྱོན་ལས་སོ་སོ་རུ།
སྐུ་བརྒྱུད་འཕེལ་ཡང་འདི་ཡིན་ངོ་མ་ཤེས།
བདུན་པའི་སྐུ་བརྒྱུད་མ་འཁྲིགས་སྡེ་གསུམ་གྲགས།
དྲུག་པ་ཤེས་རབ་ཡོན་ཏན་གཡའ་ལུང་བཞུགས།
སྲས་གཉིས་ཆུང་བ་ཁབ་སོ་སྟག་བྱོན་ལས།
ལ་སྟོད་བྱང་གི་འཁོན་ཚོ་འཕེལ་ཞེས་གྲགས།
ཆེ་བ་ཡོན་ཏན་འབྱུང་གནས་སྲས་གསུམ་གྲས།
ཚུལ་ཁྲིམས་རྒྱལ་པོར་སྲས་གསུམ་བར་པ་ནི།
བརྡལ་གྱི་ཆང་ཚང་བྱོན་ཞིང་ཐོག་མཐའ་གཉིས།
གཡའ་ལུང་བཞུགས་པའི་ཆེ་བ་གཙུག་ཤེས་ལ།
སྲས་བདུན་གཅུང་བཅས་འཁོན་ཚོ་བརྒྱད་ཅེས་གྲགས།
བདུན་པའི་ལྔ་པ་དགེ་སྐྱབས་ཤབ་ཏུ་བྱོན།
སྲས་གཉིས་བྱུང་བའི་གཅུང་ལས་ཤབ་སྟོད་ཀྱི།
འཁོན་ཚོ་གྱེས་ཤིང་གཅེན་པོ་དགེ་མཐོང་སྲས།
བལ་པོ་དེ་སྲས་ཤཱཀ་བློ་དེ་ཡི་སྲས།
གཅེན་ཡན་འཁོན་གྱི་གདུང་རབས་སྔ་འགྱུར་བདག
དཔལ་པོ་ཆེ་ནས་ཤེས་རབ་ཚུལ་ཁྲིམས་བར།