[A:༢༠༧]འབྲེལ་ཤིན་ཏུ་ལེགས་པ་ནི། སྔར་ནས་མ་བསྒྲིགས་རང་འགྲིག་ནོར་བུའི་དོ་ཤལ་འདིའི་ཐོག་དྲངས་སྤྱན་གཟིགས་དུ་མ་དང༌། འཕགས་པ་རིན་པོ་ཆེའི་དབང་ཏིང་ཛྷིཾ་ཀྵིམ་མར་མཆོད་བཤོམས་ཀྱིས་ཚོགས་བདག་གི་བསྐང་བ་ཐོག་མ་དེ་ཚུགས་པར་མཛད་པའི་སྤྱན་འདྲེན་དང་བསྟུན། ཁའུ་ཕྱོགས་ནས་ཁ་བ་བུ་ཡུག་འཚུབས་སོགས་ལྷ་འགོ་བའི་རྟགས་དང་བཅས། གསུང་བསྐང་ཡོངས་རྫོགས་ཉིན་ཁོངས་སུ་གྲུབ་པར་མཛད། དེ་དུས་ཡུམ་ཡང་སྙུན་གཞི་ལས་གྲོལ་བས་ཡབ་ཡུམ་ཞལ་གྱེས་ཏེ་དམར་པོ་སྐོར་གསུམ་གྱི་སྐུ་པར་འདེབས་གནང༌། ཚེས་དགུ་དང་བཅུར་ཡང་ཚོགས་བདག་བསྐང་གསོ་གནང་མུའི་དགུའི་སྲོད་འཁོར་ཙམ་ནས་བཟུང༌། ཁ་བ་ཅུང་ཟད་འབབ་མུར་སྐུ་གདུང་རིན་པོ་ཆེ་བལྟམས་རན་པས། རྗེ་རྡོ་རྗེ་འཆང་ཉིད་ཐུགས་ལྷག་པར་སྤྲོ་བའི་ངང་ནས་རྒྱལ་ཚིང་སོགས་དེ་སྐབས་ཀྱི་ཞབས་ཕྱི་རྣམས་ལ་སྲུང་འཁོར། སྲིད་པ་ཧོའི་ཙཀླི་བཅས་འདོགས་པར་མཛད། གང་ལ་གང་དགོས་སྔགས་དང་རྩིས་སྨན་ནས་བཤད་པའི་ཉེར་འཁོ་མཐའ་དག་བསྡུ་མཛད་ཅིང༌། ཡུམ་ལའང་གང་ཅིའི་བཀའ་འདོམས་ལྷུ་འཐིང་ཞིབ་ལྷུག་སྩོལ་རྗེས་རྩ་བའི་བླ་མ་དམ་པ་དང་དབྱེར་མེད་རྗེ་བཙུན་རིན་པོ་ཆེ་གྲགས་པ་རྒྱལ་མཚན་དང༌། སངས་རྒྱས་སྨན་བླ། རྗེ་བཙུན་སྒྲོལ་མ་རྣམས་ལ་ཐུགས་སྨོན་གསོལ་འདེབས་རྩེ་གཅིག་ཏུ་མཛད་ཀྱིན་བཞུགས་པས། སྔར་གྱི་ཁ་བ་ཆར་དུ་གྱུར་ནས་ཆེས་ཆེར་ཉིལ་བ་དང་ཆབས་ཅིག་སྐུ་གདུང་ཡིད་བཞིན་གྱི་ནོར་བུ་རིན་པོ་ཆེ་ཡུམ་ལ་གནོད་པ་མེད་པར་བདེ་བར་སྐུ་བལྟམས་