[A:༢༠༩]ཐུགས་གསལ་ལ་ཞལ་བཀོད་རྣམས་འཁྲུངས་བདེ་བ་སོགས་གྲུབ་མཚན་མངོན་སུམ་དུ་སྟོན་པ་ནས། ནམ་ལངས་མ་ཐག་གཟིམ་ཆུང་རྩེར་ལྷ་བསངས་དང་རྒྱུན་གྱི་ཞལ་འདོན་ཉམས་བཞེས་སུམ་ཅུར་ཉེ་བར་གྲུབ་འཕྲལ། སྐུ་རྟེན་བིརྺ་པའི་སྣང་བརྙན་སྡིག་མཛུབ་ཀ་ལི་ཅན་ཁྱད་མཚར། གསུང་རྟེན་རིགས་གཏེར་རིག་གནས་དུ་མ་འདུས་པའི་ཡིག་ཆ། ལམ་ཟབ་དང་བིར་སྲུང་ཕྱི་ནང་སོགས་ས་སྐྱ་པའི་ཡབ་ཆོས་དུ་མ་འདུས་པའི་དཔེ། ཐུགས་རྟེན་ལྕགས་ཀྱི་རྡོ་རྗེ་རྩེ་དགུའི་ཐོག་དྲངས་རྟེན་འབྱུང་དངོས་སྐྱེས་བཟང་དགུ་བཅས་བསྩལ་ཏེ། ཕན་བདེ་འབྱུང་བ་སོགས་དགེ་ལེགས་ཚིགས་བཅད་ཁ་ཤས་བཅས་པའི་ལེགས་སོ་དང༌། ཡུམ་མཆོག་ལའང་བྱས་ཤེས་དྲིན་གཟོ་དམ་པའི་རང་བཞིན་ཅན་གྱི་གནང་ཆ་དང༌། ཞབས་འབྲིང་པ་རྣམས་ལའང་དེ་བཞིན་བཅས་མཛད་ཅིང༌། ཆོས་བཀའི་ཐོག་མར་རྗེ་བཙུན་ས་སྐྱ་པའི་ཡབ་ཆོས་སྐྱོབ་པ་འཆི་མེད་དབང་པོ་ལྷ་དགུའི་དཀའ་དབང་གི་སྣ་བདུན་རྫས་བརྒྱད་རྣམས་གདུང་རྒྱུད་རིན་པོ་ཆེའི་སྐུ་པང་དང་བཞུགས་གདན་ཁར་འཇོག་པར་མཛད་པས། དེའི་ཚེ་གཞན་ལས་འདྲ་ཆགས་པ་ཞིག་བྱུང་གསུངས། དེ་ནས་གུ་རུ་དྲག་དམར་གྱི་དབང་ཕུལ་གྲུབ་འཕྲལ་རྗེ་ཉིད་ཀྱི་དབུ་སྐྲ་བསིལ། གང་ན་ཐོད་དང་སྐྲ་གསར་དང༌། ཞེས་སོགས་ཀྱི་ལུང་དང་འབྱོར། དེ་ནས་དབང་ཁང་དུ་ཕུར་མཆོད་གཏོར་གཟབ་གཤོམ་ངོས་སྔ་མགྱོགས་ཀྱིས་གཏང་རག་དང༌། རྒྱུན་རིང་བར་ཉིན་ལྟར་སྐུའི་རྐྱེན་སེལ་མཐའ་ཡས་པ་ཞིག་མཛད་པར་གྲགས། སྐུ་བལྟམས་ནས་ཞག་བཅུ་ཟླ་བཅུ་ལོ་བཅུ་རྣམས་ལ་